NASIKOP sa kapolisan sa Bunawan Police Station ang gikonsiderang top 9 drug personality sa ilang area of responsibility alas otso sa gabii, Huwebes, sa Purok 3, Kasilak, Barangay Mahayag, Bunawan District, dakbayan sa Davao.

Ang suspek mao si Jovanie Baquirel Bantan, alyas Ban-Ban, 23, residente sa Purok 3, Kasilak, Barangay Mahayag.

Si Chief Inspector Jesus Castañeda, hepe sa Bunawan Police Station, nagbutyag nga human nila masikop si Bantan, ila sab dayong nasikop ang giingong supplier og shabu nga si Johnson Morato Maani, alyas Banjo, 35.

Si Maano nasikop sa Kilometro 22, Sea Oil, Bunawan District human sa positibong impormasyon nga gipaabot sa kapulisan.

Tulo ka sako ug laing 12 pa ka pakite sa gituohang shabu nga dunay street value nga P56 mil ang nakumpiska gikan sa dinakpan.

Una niini, ala 1:10 sa kaadlawon niadtong Huwebes nasikop sa Bunawan PNP ang usa ka Ronald Tacsan, 37, nagpuyo sa Purok 9, Barangay Mahayag diin duha ka pakite sa shabu ang nakumpiska gikan sa suspek.

Giingon ni Castañeda nga magkaila ang tulo sa ilang mga ilegal nga transakyon sa droga sa dapit.

Kasong pagsupak sa Republic Act 9165 kun Comprehensive Dangerous Drugs Act of 2002 ang ipasaka sa mga dinakpan didto sa korte. (JPC)