LISUD apan nagtuo gihapon si Japeth Aguilar nga makakuha og luna si Bobby Ray Parks sa National Basketball Association (NBA) basta maningkamot lang kini sa iyang mga duwa.

Ang 6-foot-9 forward sa Barangay Ginebra nagkanayon nga adunay igong abilidad si Parks nga magsilbi niyang puhonan aron makasulod sa NBA ilabi na kon mopaubos kini og training sa Amerika.

"He (Parks) has all-around game. He's a very decent player and he's just what a coach wants because pretty much, he's an all-around player," matud ni Aguilar sa pagpakighinabi sa Spin. ph.

Si Parks, kanhi two-time UAAP MVP, nagplano nga moapil sa rookie draft sa NBA karong Hunyo 25.

Si Aguilar maka-relate sa pangandoy ni Parks gumikan kay iya sab kining gitinguha tulo na ka mga tuig ang nakalabay.

Ang produkto sa Ateneo ug Western Kentuck Hiltopper misuway pagsulod sa NBA pinaagi sa pag-apply una sa NBA D-League Draft diin nahimo siyang 109th sa Santa Cruz Warriors.

Apan usa siya sa 20 ka mga magduduwa nga gitangtang sa Warriors.

Nakadesider si Aguilar nga mobalik sa nasud ug gipadayon ang iyang basketball career sa Philippine Basketball Association.

Matud sa agent ni Parks nga si Charlie Dy nga nakigtambayayong na sila sa bantugang American skills trainer nga si Christopher Thomas sa milabay nga semana sa Indianapolis.