MALIPAYONG gipahibawo sa Golden State Warriors nga makaduwa na sa Game 1 sa NBA finals ang ilang shooting guard nga si Klay Thompson.

Matud sa Warriors, nakompleto na ni Thompson ang concussion protocol sa NBA ug andam na kini moduwa sa Game 1 sa ugmang adlawa kontra sa Cleveland Cavaliers.

Gitugotan na sab kini sa team doctor human mahimong symptom free sa iyang concussion.

Sayo niini, nakahiagom og injury ang All-Star shooting guard human matuhod sa ulo kontra sa Houston Rockets sa Western Conference finals.

Samtang gituohan nga dili gihapon mahimong 100 percent ang kondisyon ni Cleveland Cavaliers pointguard Kyrie Irving.

"Unless something miraculous happens," matud pa ni Irving.

Dili makasalig niini ang Cavaliers. Ang All-Star pointguard wala gipaapil og pipila ka mga tipik sa praktis sa Cavaliers sa miaging mga adlaw gumikan kay padayon kining nagpaalim sa angol sa iyang wala nga tuhod nga iyang naangkon sa Game 2 sa Eastern Conference finals batok sa Atlanta Hawks.

Nagkanayon si Irving nga padayon siyang gitambalan ug wala pay tino kon hingpit na ba siyang maalim alang sa NBA Finals. "It's a day-by-day thing," matud ni Irving.

Ang kontribyusyon ni Irving gikinahanglan kaayo sa Cavaliers ilabi na ang pagpakigparang niini sa MVP sa Warriors nga si Stephen Curry.

Gilauman nga si Matthew Dellavedova mao una ang mohulip sa posisyon ni Irving isip starting pointguard sa Cavaliers.