ANG Autonomous Region in Muslim Mindanao (Armm) ug Davao City-based Team Philhealth mao'y mihari sa lalaki ug babayeng dibisyon sa Davao City Summer Fest 2015-Mindanao Open Invitational Beach Volleyball didto sa Liza's and Marithes Seafoods Grill Restaurant sa Times Beach, Matina.

Ang mag-tandem nga sila si Gabshar Tahiluddin ug Halim Khan sa Armm gipalukapa ang Davao Optima's Carven Sarte, National University Games ug BIMP Eaga Friendship Games gold medal performer, ug Edmar Flores sa best-of-three finals, 15-11, 12-15, 15-12.

Ang magpares sa Tawi-Tawi nga sila si Nur-Amin Madsairi ug Roldan Medino Jr. gipayukbo sila Johnel Amora ug Danilo Arat Jr. sa Davao del Norte alang sa ilang ikatulong puwesto, 21-14.

Samtang sila si Philhealth's Liezl Manatad ug May Shiel "Mitch" Agton maoy nanguna sa dibisyon sa mga babaye human midaug, 21-18, kontra nila Maricel ug Cherry Cabus sa National Irrigation Administration (NIA) sa finals.

Si tournament director ug Philippine Volleyball Federation (PVF) D'Artagnan "Daks" Yambao miingon nga usa ka set lang giduwa ang women's finals tungod sa kakuwangan og oras.

Ang RCube gilangkuban nila Analyn Diaz ug Renelyn Raterta maoy ikatulo human gilampaso, 21-18, sila Davao Norte's Dannah Quisado ug Mary Ascua.

Ang kampeyon miuli og P36,000 samtang ang misunod nga tulo ka puwesto nakadawat og P27,000, P18,000 ug P9,000 sa maong han-ay.

Ang kalihukan gipresenta sa lokal panggobyerno sa Davao pinaagi sa Sports Development Division of the City Mayor's Office ug gi-organisa sa Davao Volleyball Association kauban ang PVF 11.