Roel “Macau” Butaya Dy

Tabada St., Mambaling, Cebu City

PASADO alas tres na sa kaadlawon dihang natapos si Cherry Anne pagtuon alang sa exam ning adlawa. Dihang may mituktok sa pultahan sa iyang lawak dali niyang gihipos ang iyang notes ug libro.  Misud si Mama Carmen niya tungod sa kabalaka sa pagpunay og pamuwaw sa bugtong nilang anak nga dalaga sa bana niyang si Tonyo. Naa na sa ikatulong tuig si Cherry Anne sa kursong AB in Political Science sa University of San Agustin.

“Cherry Anne… anak, ayaw palabi’g puwaw uy! Hatagi sab ang imong lawas og oras sa pagpahuway”, ni Carmen sa dakong kabalaka.

“Padung na bitaw ko matulog Ma. Mao ra man ni akong puhonan ang pagka Dean’s Lister nako unya nga diploma sa kolehiyo. Hibawo baya ka nga di baya ko gwapa sama nimo. Kon wa koy college degree, na samot…kinsa kahay mo punit nako no?” komedya ni Cherry Anne.

Di sama sa ubang babaye nga nagtungha sa prestihiyuosong unibersidad, si Cherry Anne wa bendisyuni sa kahitas-an og matahom nga nawong. Apan ang mga kurba hinuon sa iyang lawas makapahunong usahay og trapiko kon molabang kini’g karsada. Iwit si Cherry Anne sa mga admirer. Sagad sa iyang mga klasmet mga maanyag. Samtang siya halos way molingi tungod kay yano ra kaayo ang kinatibuk-an niyang pamayhon.

Usa niana ka buntag, gipatawag si Cherry Anne sa Dean sa College of Liberal Arts & Sciences. Didto sa opisina nahibaw-an ni Cherry Anne nga siya ang napili nga mo-representar sa ilang departamento sa ipahigayong Search for Miss University of San Agustin (USA). “Garbo sa atong departamento kon ikaw ang mapili nga Miss USA,” dasig ni Dr. Carmela Borromeo, ang dean. Nagmakuli si Cherry Anne pagsanong sa maong tanyag, apan sa kaulahian gilupig ang iyang mga kahingawa sa mga lig-on nga rason Dr. Borromeo.

Miabot ang adlaw sa Search for Miss USA nga gipahigayon sa Grand Ballroom sa usa ka Hotel. Kulba-hinam ang kompetisyon. Pulos sila matahom ug may tagsa-tagsa ka abilidad. Apan lagi, usa ra gyud kanila ang molutaw nga mananaog ug maoy molukdo sa prestihiyusong korona. Sa presentasyon sa special awards, sama sa Best in swimsuit, Miss Friendship, Miss Photogenic ug Best in evening gown, way usa nga naangkon si Cherry Anne. Didto kini ihatag sa mga kandidata sa laing mga departamento.

Human mapili ang lima ka finalists, gisunod dayon ang pinaka kulba-hinam sa kompetisyon, ang Question & Answer nga bahin. Gani, kini ang gi angga-an og make or break sa mga kandidata nga nakasulod sa listahan sa finalists. Gamay nga sipyat sa tubag nagkahulogan og kapakyasan. Gisugdan dayon sa Master of Ceremonies pag-pasupot sa common question nga: “What role does beauty have in the world dominated by computers?”

Sa upat ka finalists way usa nila nga nakapadayeg sa mga sakop sa Board of Judges.

Si Cherry Anne nga maoy katapusang gitawag. Tubag ni Cherry Anne: “Computers are gadgets for communication. They are instruments which turn this world into a tiny global community. The role of a woman who symbolizes beauty is like a computer which conveys a message of unity and understanding. If unity and understanding are achieved then love will prevail. And love is the essential element for a lasting peace in a world we wish to live in.”

Sa pagkadungog sa tanang nanambong sa mga pulong ni Cherry Anne kalit silang nanghugyaw ug mipabati sa lanog nga pinakpakay. Mibarog ang tsirman sa board of judges ug mipadayag sa ilang hukom.

Naangkon ni Cherry Anne ang korona isip Miss USA. Niining gabhiona misidlak ang pa­may­hon sa yano ug simpleng kolehiyala. (Katapusan)