GIIMBESTIGAHAN na sa Mati City Police Station ang natigayong pagpamusil sa wa pa mailhing mga armado sa provincial officer sa National Commission of Indigenous Peoples (NCIP) sa Davao Oriental kon diin usa ang napatay ug duha ang samdan.

Natigayon ang pagpamusil alas 6:00 sa gabii, Martes, didto sa Matiao Public Market, Mati City.

Mga samaron mao si Julius L. Mabini, provincial officer sa National Commission of Indigenous Peoples (NCIP) sa Davao Oriental, kinsa giingong anaa na sa luwas nga kahimtang, ug si Sylvestrito Pausta, giingong bodyguard ni Mabini kinsa padayong gi-obserbahan sa mga doktor samtang ang napatay mao si Bienvinedo Madanlo.

Base sa inisyal nga imbestigasyon sa Mati Police, nasayran nga samtang nagbaktas ang mga biktima padung sa opisina sa NCIP duol sa palengke, dunay duha ka lalaki sakay sa motorsiklo armado og pusil ug gipaarakan ang mga biktima.

Si Police Regional Office (PRO) Davao spokesperson Police Superintendent Antonio Rivera misulti nga ila pa nga gihulat ang follow-up report sa Mati police apan gitan-aw gihapon sa kapulisan ang personal nga bangi diha sa ilang imbestigasyon.

"After the report has been filed, we will reveal the details if the motive of the incident was connected to their work or if its personal," sulti ni Rivera atol sa AFP-PNP Press Corps sa Conference hall sa Davao City Police Office kagahapon.

Ang duha ka biktima padayong giatiman sa mga doktor sa Camilus Hospital sa Mati City. (KP/JC)