HAPPY new year sa atong mga kaigsuonang Tsinoy.
Maayo daw sa negusyo ang Tuig sa Manok. Ambot kaha kung sunoy ba o himungaan? De rasa o sanggabon; abuhon o ogis?
Kamong mga sakop sa "wing squadron" ang labaw'ng nakasabot sa akong buot ipasabot. Busa kadtong nagplano og negusyo, panahon na nga magsugod og hunahuna kung unsay sudlan.
Ang akong higalang si Cesar magsugod na'g paninda og bulad gikan sa General Santos nga iyang i-apud-apod dinhi sa Davao. Plano niya nga gikan sa ginagmay, modako hangtud sa duha ka toneladang bulad ang iyang angkaton sa mga suki matag bulan. Natukod na niya ang iyang distribution system sa pipila ka lugar sa Bangkal ug Matina. Inom lang mo'g daghang tubig aron dili magkabato sa kinaon og bulad.
Sa laing bahin, gikuyogan nako sa akong higala nga si Marcel usa ka Swiss national ug Jew nga taga Israel nga nagpangedaron og 77 anyos. Usa siya ka market consultant sa dagkong kompaniya sa agri-business sa Israel ug pipila ka kompaniya sa L.E.D. nga suga sa China.
Dinhi siya sa Davao aron subayon ang pipila ka lugar nga puwedeng butangan og "Tomato Greenhouse" nga gigamitan og Israel technology.
Matud pa niya nga liboan ka tonelada nga kamatis ang ginaangkat sa Pilipinas gikan sa laing nasud, ilabi na sa Turkey ug Australia. Gagmay ang kamatis sa Pilipinas nga gigamit sa pagkaon sa panimalay.
Dugang niya nga buot sa iyang kompaniya nga mahimong numero unong suplayer sa kamatis sa Pilipinas nga magamit isip juice, catsup ug sa inadlaw-adlaw nga gamit sa panimalay sama sa salad.
Nahiabot siya dinhi sa Davao tungod sa iyang higalang Pilipino nga musikero nga taga Davao nga atoa na karon sa China.
Gidapit siya sa iyang higala nga moanhi sa Davao tungod kay kaila niya si PRody Duterte ug buot niyang makatabang sa kampanya sa pagbag-o sa nasud.
Gihanyag niya ni Mayor Inday Sara niadtong niaging tuig ang iyang proyekto apan di kini niya maatiman tungod sa problema sa iyang pagsabak og triplets.
Busa gi-refer sa mayor ang proyekto iyang higala nga kanhi bise mayor sa Butuan nga may yuta aron didto ipundar ang unang experimental greenhouse sa iyang gitukod nga kompaniya nga VIN-MAR International Trading.
Siyam ka ektarya ang ilang planong pagasugdan sa Butuan samtang nangita pa kini'g lugar nga butangan og greenhouses sa Davao, Caraga, Davao del Sur, North Cotabato ug Maguindanao.
Aduna na usay panaghinabi sa pipila ka tag-iya sa yuta sa Bohol ug Cebu nga ibutang ang proyekto.
Buot sa maong proyekto nga modaghan ang makatrabaho ug motaas sa kinitaan sa mga mahiapil sa "Greenhouse Network sa Pilipinas".
Sa laing bahin, makahibalo sab kita sa teknolohiya sa Israel dili lang sa agrikultura apan sa enerhiya, patubig, ug uban pa. Mga unom ka erya ang giplanohan nga ibutang sa Southern Mindanao sud 2017-18.
Plano usab nga magtukod og Israel Agriculture Technology Center dinhi aron hingpit nga makat-onan sa Pinoy ang ilang teknolohiya sa pag-uswag sa ilang nasud taliwala sa kakulang sa rekursos di sama dinhi sa Pilipinas. Hevenu Shalom Aleikhem!