MOKABAT sa P1 milyon ang kantidad sa gituohang shabu nga nakumpiska sa kapulisan human sa gilusad nga drug bust sa Buhangin Police Station alas 2:15 kagahapon sa kaadlawon, Mayo 3, sa Barangay 10-A, Poblacion.
Si Police Chief Inspector Alfredo Lasam Miguel, hepe sa Buhangin police, mi-asoy nga nadakpan sab ang suspek nga si Urbiegreen Tañedo Puyat, Tattoo artist ug residente sa Purok Sta. Cruz, Barangay Indangan, Buhangin District.
Matod ni Miguel nga dugay na sab nilang gipanubayan ang ilegal nga lihok sa suspek gumikan usa ang dinakpan sa gikonsiderang notadong pusher sa area of responsibility (AOR) sa Buhangin.
Alas 11:55 sa gabii, Martes, unang nakig-text ang suspek sa nagtakuban nga sakop sa kapulisan kinsa mao'y nahimong poseur buyer diin nasabutan nga magkita didto sa Kilometro 5, Buhangin apan nabalhin kini sa Barangay 10-A.
Human gidawat sa suspek ang P500 nga drug bust money, gilayon siyang giposasan sa poseur buyer ug daling midugok ang naka-istambay nang daan nga mga pulis sa palibot.
Nakuha sa posisyon sa dinakpan ang usa ka dakong sako sa gituohang shabu, laing lima ka pinataas nga korte sa pakite, usa ka gamay nga pakite ug usa ka rectangular pack sa pinaugang dahon sa marijuana nga gisulod sa itom nga sling bag.
Suma ni Miguel nga ang tanang druga nga nakuha gikan sa suspek dunay street value nga P1 milyon diin kini ang pinakadako nga operasyon batok druga sukad sa iyang pagdala sa maong AOR.
Samtang depensa sa suspek nga igo lamang siyang gipadala sa maong bag, ug wa siya masayud unsay sulod niini nga ipahatag sa tawo nga makigkita kaniya.
Sa kasamtangan, ang suspek temporaryong gibalhog sa selda sa Buhangin police samtang giandam na ang kasong kalapasan sa Republic Act 9165 kun Comprehensive Dangerous Drugs Act of 2002.