SA PRISOHAN nagsaulog og Chinese New Year ang duha ka Chinese national human sila gisikop sa pulis kay gidunolan nila'g kuwarta dihang giisyohan sila og citation ticket kay nanigarilyo sa publiko nga lugar.
Biyernes sa gabii, gipasakay sa mobile patrol sa San Pedro Police Station ang duha ka Chinese national nga gipangtago ang mga pangalan human misulay og pagpanuhol sa mga pulis sa Palma Gil Street, Barangay 3-A Poblacion, siyudad sa Davao.
Subay sa blotter nga natala sa presinto dos, nasayrang nagpatrolya ang Mobile Patrol Group (MPG) sa Davao City Police Office (DCPO) diin ilang naaktuhan ang usa ka Chinese national nga nanigarilyo atubangan sa Casino Filipino.
Dihang ilang dunolan na og citation ticket sa pagsupak sa Smoking ordinance sa siyudad, misulay og areglo ang usa pa ka Chinese national nga kauban sa nanigarilyo.
Giingon nga gidali og dunol sa usa ka langyaw ang P500 ngadto sa pulis hinungdan nga gidakop silang duha og gilayong gidala sa presinto.
Ang duha ka langyaw mag-atubang og kasong bribery ug paglapas sa smoking ordinance ning siyudad. (Jeepy P. Compio)