SUMALA sa Commission on Human Rights (CHR) ang pagdagit ug pagpatay sa Koreanong magpapatigayon nga si Jee Ick-Joo nagpakita nga ang gubat batok sa ilegal nga drugas nga gideklarar ni Pres. Rody Duterte gihimo lang nga salimbong sa mga dautang sakop sa kapulisan sa mga krimen nga ilang nabuhat.

Ato kining klaruhon. Ang gubat batok sa illegal nga drugas gihimong salimbong sa mga daotang sakop sa kapulisan sa mga krimen nga ilang gibuhat kay ila mang gipasangil sa Tokhang.

Kadaghanan sa mga sakop sa kapulisan mga tarung ug mga buotan. Mao gani nga dunay komedya bahin sa mga hubog nga nag-estroyahay. Usa kanila isog kaayong niingon nga di siya mahadlok sa pulis. Wa siya kahibawo nga dunay pulis sa iyang tapad. Matod pas pulis, “Unsa, di ka mahadlok sa pulis?” Tubag pas hubog, “Nganong mahadlok man ko nga kanang pulis maayo man nang tawo.”

***

Mokabat na sa kapin sa 7,000 ka mga suspetsado sa illegal nga drugas ang napatay sukad sa pagsugod sa gubat batok sa illegal nga drugas.

Matod pa sa CHR, “The so-called ‘war on drugs’ has become a convenient cover for rogue elements within the Philippine National Police to commit other crimes, such as kidnapping for ransom of foreign nationals.”

Mao kini ang angayan nga tan-awon sa atong Presidente. Di niya hatagan ang kapulisan og blanket authority mahitungod sa ilegal nga drugas. Di niya labanan ang tanan.

Ang nahitabo, ang mga badlungong mga sakop sa kapulisan nagpadayon sa ilang binuang, pero ilang gipasangil sa ilegal nga drugas aron matabonan ang ilang mga binuang.

***

Pila man kaha sa 7,000 ka mga kalag ang nagkondenar kay di tinuod nga nalambigit sa illegal nga drugas?

Tingali ang uban kanila nakabangga lang sa illegal nga mga negusyo sa mga badlungon nga sakop sa kapulisan.

Sa makadaghang higayon, nakadungog ko nga planteran og drugas sa pulis ang mga suspetsado, labi na kon gamay ra ang kaso ug dali ra nga makapiyansa. Daghan sa mga ronda nga gihimo sa kapulisan nga wa silay makuha nga ebidensiya gikan sa suspetsado.

Dihay suspek nga nagpakiluoy ug niingon nga wa siyay shabu. Matod pa sa pulis,

“Kon wa kay shabu, dunay mi,” Impas ang suspetsado.

Sumala sa CHR, mahinungdanon ang pagtahod ug pagtamod sa mga tawhanong katungod sa due process of law. Way problem sa mga tarong. Ang problema mao kadtong mga badlungong sa kapulisan.