NIKABAT na sa 61 ka mga tawo ang mga misaksi human sa dugang 46 ka mga testigo ang gihinabi sa artsidyosesis sa Sugbo alang sa tinguha nga maba­yaw sa pagka santos si anhing Arsobispo Teofilo Camomot.

Si Padre Mhar Vincent Balili, vice postulator for the cause of sainthood ni Camomot, nibutyag nga nahuman na nila og interbiyo ang bag-ong 46 ka mga testigo ug nahuman na usab nila og kolekta ug na-validate ang tanang mga sinuwat sa Sugboanong arsobispo.

Ang bag-ong mga testigo, matod niya, maoy dugang sa naunang 15 ka mga testigo nga naduso na nila ngadto sa Sacred Congregation for the Causes of Saints (SCCS) sa Roma.

Si Balili niingon ang bag-ong buhi nga mga testigo mga katekista, kaubang pari ug ubang mga alagad sa simbahan nga nagagikan sa siyudad sa Talisay; Pob­lacion Pardo, dakbayan sa Sugbo; siyudad sa Carcar, Iloilo ug Cagayan de Oro kun sa mga parokya nga kanhi gialagaran ni Camomot sa dihang buhi pa.

“Gikuha ang ilang first hand testimony sa iyang kinabuhi mintras obispo siya,” paambit sa vice postulator ngadto sa mga tigbalita.

Sumala ni Balili nga ang ilang gibuhat karon mao ang paghimo sa gagmay nga mga rekisitos sa dili pa iduso ang mga gikinahanglan ngadto sa Roma.

Tinguha nila nga mahuman ang tanan sa dili pa ang kasumaran sa adlaw nga natawhan ni Camomot karong Marso 3, 2017.

Si Balili nidugang nga niayuda ang Theological Commission sa pag-review sa mga sinuwat ni Camomot sama sa mga libro, wali ug mga circular letter kon nahisubay ba sa pagtulon-an sa simbahan.

“Thanks be to God, positive ang ilang findings, way contrary to our doctrines sa simbahan,” dugang niini.

Ang uban sa mga sinuwat ni Camomot natapok na sa mga madre sa Daughters of Saint Teresa, ang religious congregation nga gitukod niini nga naa nagbase sa Barangay Valladolid, dakbayan sa Carcar.

Samtang, ang uban gikan sa Chancery sa artsidyosesis ug archive sa mga parokya sa Jaro, Iloilo; ug Cagayan de Oro diin kanhi nangalagad ang arsobispo.

Ang SCCS nitugot sa artsidyosesis sa Sugbo nga ipadayon ang pasiuna nga proseso sa pagkuha og mga dokumento ug mga salaysay sa mga testigo human gibuksan ang cause sa iyang beatipikasyon human sa pormal nga petition sa DST niadtong Septi­yembre 2010.

Si Balili niklaro nga naa pa sa diocesan level ang proseso nga ilang gibuhat sa dili pa ang laing rekisito nga mao ang pagpangita og milagro sa mga testigo nga nangaayo sa ilang mga sakit human nanginlaba ug nag-ampo ni Camomot ug niabot og lima ka tuig ang ilang kaayohan.

Kon masanto si Camomot, siya maoy ikaduhang Bisdak, ang una mao si San Pedro Calungsod, ug ika­tulong sa Pinoy diin ang nauna mao si San Lorenzo Ruiz.