USA ka Cebuana ang unang Filipina nga gikoronahan nga 'Grandma Universe 2017' nga gipahigayon sa dakbayan sa Sofia, ulohang dakbayan sa nasod sa Bulgaria sa Eastern Europe niadtong Enero 21, 2017.
Si Agnes Padao Jakosalem, 50, dunay duha ka mga anak ug usa ka apo, maoy nirepresentar sa Pilipinas sa naasoy nga internasyonal nga indigay sa kaanyag sa mga lola.
Si Jakosalem, gikahinabi sa Superbalita Cebu kagabii, nipaklaro nga dili pareho ang organizers sa Miss Universe pageant nga nia gipahigayon karon sa Pilipinas.
"Ang Mrs. Universe kauban sa Grandma Universe ug ang organizers nagbase sa Bulgaria," matod ni Jakosalem.
Gibutyag niya nga ikaduha siya nga Pinay nga niapil sa maong indigay nga taudtaod nang nagsugod sa Bulgaria.
"Bag-o lang sila nga nihimo sa pageant nga international," ason ni Jakosalem, kinsa nabalik sa Sugbo kagabii.
Matod niya nga nakaapil siya sa maong indigay dihang napilian sa pre-selection sa nasod ug gisuportahan sa
daghang sponsors.
".. Sabotan this year nga pagpahimo og pagent," matod ni Jakosalem.
Nakadungog siya nga nagplano ang organizers sa pagpahigayon sa international pageant sa mga lola dinhi sa Sugbo ning tuiga.
Ang nag-unang criteria, dason niya nga siyempre usa na ka lola ug nagbaton gihapon sa kaanyag.
Nag-unang kawsa sa maong indigay mao ang katungod ug kaayohan alang sa mga lola.
Gibutyag ni Jakosalem, walay question and answer sa programa apan giparampa sa ilang seksi nga sinina ug mga mamugnaong national costume.
Apan, dugang niya nga sa wala pa ang pageant proper, gipasuwat sila og bahin sa ilang kasinatian sa maayong parenting ug panglantaw sa ubang isyu bahin sa mga lola.
Si Jakosalem, kinsa usa ka negosyante, niingon nga mopadayon sa iyang kawsa sama sa pagtukod og club sa mga lola nga nakasentro usab sa pag-ampo ug pag-atiman sa maayong panglawas.
Sa pagkakaron, si Jakosalem maisip nga ambahador sa mga lola ug nagpaabot siya sa pagkontak gikan sa organizers bahin sa kampanya sa ilang kawsa.