NAGPAKATAP og 43 puntos lakip na niini ang makapaukyab nga half-court shot sulod lang sa tulo ka quarters si Stephen Curry aron agakon ang host Golden State Warriors sa hingpit nga dominasyon batok sa Los Angeles Clippers, 144-98, kagahapon sa National Basketball Association (NBA).
Sa 3rd quarter, daw nag-inusarang sundalo ang back-to-back MVP nga ningsugod og lubong sa usa sa mga lig-ong karibal sa Warriors sa Western Conference. Ning maong quarter, nimugna si Curry og personal best nga 25 puntos.
Ang 46 puntos nga kadaugan maoy labing dako nga nahimo sa Warriors ning maong season.
Miugyaw ang mga tumatan-aw sa Oracle Arena human napasulod ni Curry ang iyang halfcourt shots sa dayong pagtingog sa halftime buzzer.
Sa halftime, ang Warriors naglabaw na og 72-51 apan wala pa ninggawas ang kamangtas ni Curry niadtong mga gutloa.
Napasulod ni Curry ang walo sa iyang 11 ka mga itsa lakip na niini ang lima sa iyang ka mga three-point shots sa duwa aron hatagan ang Warriors og 117-74 nga labaw.
Si Curry, kinsa nakamugna sa iyang ikatulong 40-point game sa season, wala na moduwa sa 4th quarter.
“I have to be aggressive,” matod ni Curry. “That’s the thing about us. We do have a lot of talent. There’s a balancing act with it.”
Sa sayong bahin sa season, misakripisyo si Curry ug mihatag og mas daghang kahigayunan sa nahidugang nga pambato sa Warriors nga si Kevin Durant aron makomportable kini pagpagawas sa iyang kapabilidad.
Apan ning higayuna, nigawas ang natural nga talento ni Curry.
“What Steph has realized is he can just be himself and let it fly,” matod ni Warriors coach Steve Kerr. “He doesn’t have to worry about Kevin or anybody else. We feed off Steph’s energy and shooting.”
Si Durant nidugang og 23 puntos alang sa kadaugan samtang nitampo og 16 puntos si Klay Thompson.
Ang Clippers gipangulohan ni Blake Griffin pinaagi sa iyang 20 puntos samtang nihatag og 13 puntos si JJ Riddick.
“We just got embarrassed on national television so nobody’s feeling good right now,” matod ni Clippers guard Austin Rivers.
Ang Warriors mingsaka sa 40-7 nga rekord samtang nahugno sa 30-18 nga baraha sa Clippers. (AP)