GIPAKUSGAN sa Police Community Relation (PCR) sa San Pedro Police Station ang ilang information dissemination labot sa nagkadaiyang kampanya sa kapulisan sa ilang area of responsibility sa dakbayan sa Davao.

Sabado sa hapon, ang PCR sa presinto dos uban ni Senior Inspector Bienvinido Cuison, officer of the day, milibot sa kabalayan sa Dapsa, Barangay 2-A Poblacion ning dakbayan diin nanghatag og campaign materials sa mga residente.

Unod sa maong campaign materials mao ang pagpahibalo sa katawhan sa dautang epekto sa ilegal nga druga, mga pamaagi nga malikay sa kawat, bomb awareness ug pahimangno alang crime prevention.

"Educating awareness to the community is one of the various actions of this office so as our people shall be more vigilant to avert from harmful instances/incidents," mensahe sa PCR sa presinto dos.

Di lang ang San Pedro Police Station ang mihimo niini, lakip ang tanang istasyon sa kapulisan ubos sa Davao City Police Office ug rehiyon onse diha sa pag-edukar sa katawhan sa mga butang ug pamaagi aron mas makab-ot ug masinati pa ang kalinaw sa komunidad.