MASUBHAN si KJ Cataraja isip professional boxer sa iyang pagpakigbatok kang Indonesian Ardi Tefa sa special six-round attraction sa Pinoy Pride 31 - “Clash of the World Champions” karong Hulyo 4 sa Waterfront Hotel and Casino sa Lahug ning dakbayan.

Human siya nakalangkat og gold medal ug nahimong Best Boxer awardee sa PRISAA National Collegiate Games, si Cataraja nakadesisyon nang mosulod sa professional rank.

Usa si Cataraja sa multi-titled amateur boxer gikan sa ALA gym diin 14 na ka gold medals ang iyang nahipos gikan sa regional ug national tournaments.

Lakip sa iyang gilupig sa amateur mao ang mga sumosulbong karon nga fighter sa ALA gym nga si Mark Magsayo sa PLDT ABAP Visayas Regional Championship niadtong 2010.

Gilaumang malisod nga tahas ang mosugat ni Cataraja sa professional rank kay ang iyang kontra nakaaway og dekalidad nga mga boksidor sama nila ni kanhi World Boxing Council (WBC) super flyweight titleholder Srisaket Sor Rungvisai ug world title contender Denver Cuello.

Si Tefa adunay 6-4, 4KOs nga rekord.