SAMA sa ubang mga mahiligon og basketball sa kalibutan, naghinamhinam na si 8-time world boxing champion Manny Pacquiao sa 2015 National Basketball Association (NBA) Finals nga sugdan ugma (RP time).
Asa modapig ang Pambansang Kamao sa Pilipinas?
Sa interbyu sa www.philboxing.com, gipadayag ni Pacquiao nga sa Golden State Warriors siya modapig ug dili sa Cleveland Cavaliers gumikan sa simpleng rason – daghang mga Pinoy ang nagpuyo sa California diin nahimutang ang balwarte sa Warriors nga Oracle Arena sa Oakland.
Ang Warriors nakaabante sa NBA Finals sa labing unang higayon sulod sa 40 ka mga tuig human nila gipalagpot ang Houston Rockets, 4-1, sa Western Conference finals series.
Samtang ang Cavaliers nakabalik sa finals human nila gipangbutlogan ang Atlanta Hawks, 4-0, sa Eastern Conference finals series.
Naila na sab si Pacquiao nga nagsuporta sa Warriors. Gigamit ni Pacquiao ang practice facility sa Warriors sa Oakland niadtong Agusto sa miaging tuig alang sa iyang cross-training exercise.
Unya ang mga anak ni Pacquiao nga sila si Jimuel ug Michael ningtan-aw sab sa duwa sa Warriors sa Oracle Arena samtang nag-training ang fighting congressman alang sa away niini batok kang Floyd Mayweather Jr.
Ang superstar sa Warriors nga si MVP Stephen Curry mihatag sab kang Pacquiao og jersey nga adunay pirma.
“Pilipinong-Pilipino ang dating ng Warriors, especially Curry,” asoy ni Pacquiao sa interbyu sa www.philboxing.com. “Wala siyang kayabang-yabang, simpleng-simple lang kahit na siya ang tinanghal na season MVP of the world’s biggest pro-league.”
Si Pacquiao, kinsa usa ka playing coach sa KIA Carnival sa Philippine Basketball Association (PBA), mibutyag nga mibisita kaniya si Curry sa iyang training camp.
Ang mga anak ni Pacquiao nagpahulagway kauban si Curry.
“I appreciate that gesture. Napakabait niya. Parang Pilipino talaga. Binigyan pa nga niya ako ng playing uniform niya,” asoy ni Pacquiao.