ALANG kang Cleveland Cavaliers forward LeBron "King" James, wala’y bisan kinsa ning kalibutana nga ma­ka­pugong kaniya. Kusgan kaayo siya, abtik, ug adunay saktong abilidad.

Aron makaangkon pagbalik ang Golden State Warriors og titulo sa Na­tional Basketball Association (NBA), ki­nahanglan nilang mapugngan si James, four-time MVP, sa NBA Finals nga sugdan ugma (RP time).

“Some have been successful. Many have failed,” matod ni Warriors forward Draymond Green kabahin sa pagpugong kang James.

Si Green, kinsa runner-up sa Defen­sive Player of the Year award, maoy usa sa upat ka mga magduduwa sa Warriors nga gitahasan sa pagdepensa kang James.

Usa kini ka dakong tahas sa Warriors.

Sa regular season, ang Warriors maoy numero uno sa depensa diin ilang nalimitahan ang ilang mga na­nga­kontra sa average nga 42.8 per­cent shooting, labing ubos sa liga.

Alang sa Warriors, aduna sila’y kapabilidad sa pagpugong kang James apan gikinahanglan nila ang su­porta sa usa’g usa.

“Our defense is the best in the league, but we’re looking forward to the challenge,” matod ni Warriors cen­ter 7-footer Andrew Bogut.

Sa nag-inusarang duwa diin na­kaharong ni James ang depensa sa Warriors, wala ra kaayo siya maglisod sa opensa diin nimugna siya og season-high 42 puntos sa 110-99 nga kadaugan sa Cavaliers niadtong Pebrero 26.

Nagkanayon si Warriors coach Steve Kerr usa lang kato sa labing ma­ayong duwa ni James nga daw wala kini mahimong sayop.

Matod ni Kerr nga kinahanglang mohimo sila og adjustment aron dili kini mausab.

“Sometimes your best defense is your offense,” matod ni Kerr. “You can’t get crazy with the ball. A live-ball turnover with LeBron is just a dunk at the other end.”

Si James, kinsa nagtungtong sa ikalima niyang sunodsunod nga pagsulod sa finals, maayong nakaduwa sa nag-unang tulo nila ka mga tahas sa playoffs.

Nag-average siya og 27.6 puntos, 10.4 rebounds ug 8.3 assists matag duwa batok sa Boston Celtics, Chicago Bulls ug Atlanta Hawks.

Ang Warriors nagpakahilom kon unsa nga depensa ang ilang ipahamtang ngadto kang James sa NBA Finals.

“We’re all human, I would like to think,” asoy ni Warriors swingman Andre Iguodala, kinsa maoy labing gitahasan sa pagdepensa kang James.

Dili na bag-o alang sa Warriors ang pagpugong og superstars ning mao nga playoffs.

Si James maoy ikaupat nga mag­duduwa nga sakop sa All-NBA First-Team nga suwayan pagpugong sa Warriors. Ang nag-unang tulo mao sila si James Harden sa Houston Rockets, Marc Gasol sa Memphis Grizzlies ug Anthony Davis Sa New Orleans Pelicans. (AP)