NAGTAMBAYAYONG ang Central Visayas Adoptive Parents Association (Cvapa) ug Cebu Grand Hotel alang sa pagpahigayon og run for a cause nga giulohan og I Love Run Born From the Heart karong Pebrero 5 sa Axis Courtyard, Vibo Place sa dalan Escario, dakbayan sa Sugbo.
Ang lumba tipik sa mga kalihukan sa Cvapa alang sa pagsaulog sa tibuok nasod sa Adoption Consciousness Week karong Pebrero 11-18.
Ang tanang kita sa lumba ihatag nga donasyon sa uyamot nga mga pinaagi sa Department of Social Welfare and Development (DSWD).
“As mandated by DSWD, the association is committed to help less fortunate kids who are abandoned. The beneficiaries of the run will be the kids on the list of DSWD,” matod ni Cvapa president Kaking Sy sa Sun.Star Cebu, igsuong buhatan ning mantalaan.
Ang lumba, nga dumalaon sa Iconic Sports + Events, gilangkuban og upat ka mga kategoriya. Kini mao ang 10-kilometer, 5K, 3K, ug kiddie dash.
Mokabat ngadto sa P14,000 ang kinatibuk-ang ganti sa lumba.
Ang rehistrasyon nagbalor og P100 sa kiddie dash, P300 sa 3K, P400 sa 5K ug P500 sa 10K.
Nagsugod na ang rehistrasyon sa Runnr Store sa Ayala Center Cebu.