USA ka sakop sa Citizen Armed Forces Geographical Unit (Cafgu) ang aksidenteng nabuthan sa iyang isyu nga M14 rifle ala 1:15 niadtong Lunes sa kaadlawon, Enero 30.
Ang Cafgu mao si Romy Aguan, 23, ulitawo, ug residente sa Purok 7, Barangay Sibulan, Toril District, dakbayan sa Davao.
Subay sa impormasyon nga nakalap sa Superbalita gikan sa Toril Police Station, aksidente nga mibuto ang M14 armalite rifle sa biktima hinungdan nga nasamad siya sa sampot.
Gidali pagdala sa Mediquest Hospital ang biktima apan gibalhin kini sa Southern Philippines Medical Center.
Ang biktima nadestino sa Baracatan Detachment ubos sa 72nd Infantry Battalion.
Hinuon, anaa na sa luwas nga kahimtang ang biktima.