TINGUHA ni national coach Tab Baldwin nga masugdan na ang training sa Gilas Pilipinas karong Agusto 1 alang sa Fiba-Asia men’s championships sa Changsa, Hunan, China karong Septiyembre.

Matod ni Baldwin nga kon mahimo, makasugod og sayo ang ilang training aron makapangandam og sakto alang sa torneyo.

Matod ni Baldwin nga dugay nang napahiluna ang programa apan ang coaching staff sa Gilas dili pa makasugod hangtod dili pa mahuman ang Philippine Basketball Association (PBA) Governors Cup sa hinapos nga bahin karong Hulyo.

“I’m complete from where I am. The player pool is already selected. Now, it’s just a matter of when the camp will start, which will be determined when the third conference will finish,” matod ni Baldwin sa interbyu sa Spin.ph.

“But we’ll start (training camp) the latest on August 1, or hopefully, we can start a few days before that.”

Ang Fiba-Asia, nga magsugod karong Septiyembre 23, mao ang qualifying tournament alang sa 2016 Rio Olympics sa Brazil.

Ang Pilipinas katapusang nakapadala og basketball team sa Olympics niadto pang 1972 sa Munich, Germany.