DIGOS CITY -- Suwerte nga naluwas ang construction worker kinsa gipusil sa nag-inusarang suspek sa Purok Sunflower, Mabini Extension ning dakbayan, alas 9:41 sa buntag niadtong Sabado, Enero 28.
Suma sa spot report sa Digos City Police Office (DCPO), naglingkod lamang sa bangko kilid sa dalan sa Sanchez compound ang biktimang si Emmanuel Mendez Uy, 58, minyo sa lugar, dihang kalit miabot ang wa mailhing armado nga nagsakay og motorsiklo.
Nakasul-ob og kolor itom nga jacket ang suspek nga gilayong nihulbot sa iyang gitakin nga mubong matang sa armas ug walay daghang rason gipusil ang biktima.
Maayo na lang kay sa walang parte sa tiil naigo ang biktima kinsa daling nakadagan palayo sa suspek.
Gidapatan dayon og medikasyon sa mirespondeng sakop sa City Disaster Risk Reduction and Management Council.
Wala na maabti sa kapulisan ang suspek human abtik nga nakasibat padung sa wa matinong direksyon.
Gisulti ni Senior Police Officer 4 Irvin Laude, imbistigador sa DCPO, nga narekober nila ang lima ka basiyo sa bala sa kalibre .45 pistola.
Sulti ni Laude nga nagpadayon pa ang manhunt operation aron masikop ang namusil sa biktima.