ANDAM na si Cebu running queen Mary Joy Tabal sa iyang pagrepresentar sa Pilipinas alang sa 28th Southeast Asian (SEA) Games nga ipahigayon karong Hunyo 5-16 sa Singapore.
Sa iyang labing unang pagsalmot sa matag duha ka mga tuig nga kompetisyon, gipasalig ni Tabal nga modagan siya nga adunay garbo.
Sa interbyu sa Sun.Star Cebu, igsuong buhatan ning mantalaan, nga wala siya’y ideya kon unsa’y iyang poruhan gumikan kay mao kini ang labing una niyang pagdagan batok sa dekalidad nga runners sa Southeast Asia.
Ang 25 anyos nga lumad nga taga Guba, Cebu City maoy modala sa bandera sa Pilipinas sa 42-km. women’s race nga gikatakda karong Hunyo 7. Kagahapon nilarga si Tabal paingon sa Singapore.
Gipasabot ni Tabal nga alang kaniya, ang SEAG maoy labing dakong tahas nga iyang sagubangon sukad masukad.
Nakasalmot na man tuod siya og mga international race apan lahi ang iyang kadasig ning higayuna nga nagdala na siya sa bandera sa nasod.
Matod ni Tabal nga nagsagol kulba ug kahinam ang iyang gibati gumikan kay mao kini ang labing unang higayon nga opisyal siyang representante sa Pilipinas isip sakop sa Team Philippines.
Mapasalamaton ang produkto sa Southwestern University (SWU) athletics nga nahatagan siya ning maong oportunidad.
Bag-o lang gipaslak si Tabal sa Philippine team ug nahitabo kini human siya nidagan sa LA Marathon niadtong Marso.