NA-PROBLEMA sa iyang panan-aw, nagpakamatay pinaagi sa paghigot og pisi sa iyang liog.
Ang maong insidente nadiskubrehan pasado alas 7 ang takna sa gabii sa Bacalso Compound, Barangay Bulacao, dakbayan sa Sugbo.
Ang napalgang patay mao si Renato Bacalso Jr., 27, siomai vendor sa maong dapit.
Matod pa ni PO2 Lou Pagara sa Homicide Section nga nauli nianang gabii ang igsuon sa biktima nga si “Kimwel” ug maoy nakit-an ang biktima nga nagbitay sulod sa ilang panimalay.
Naabot ang mga silingan ug daling giputol ang maong pisi ug gisuwayan kini sa pagdala sa tambalanan, apan nakunpirmar nga patay nang daan sa pag-abot.
Atol sa dugang imbestigasyon nga gihimo nasuta nga nianang milabayng Dominggo, daan na nga mibahad ang biktima nga siya magpakamatay kay nawagtangan og paglaum tungod sa iyang mata.
Si Renato bag-o lang nga na-problema, human niya masinati ang pagka hap sa iyang panan-aw.
Tungod sa ilang kalisud, ang iyang inahan usa ka scavenger, way kwarta nga magamit aron ipahiling unta sa iyang mga mata.