APEKTADO usab ang City Traffic Operations Management (Citom) dinhi sa syudad sa Sugbo sa nagpadayon nga problema sa kuryente tungod sa rotational brownout nga nasinati karon sa dakbayan.
Usa na niini ang lakip nga pagkapawong sa traffic lights sa kadalanan hinungdan nga dili na mosunod sa mga motorista ang trapiko kon wala usab kini Citom personnel.
Niawhag karon ang operations chief sa Citom nga si Joy Tumulak nga tas-an pa sa mga sumasakay ug sa mga motorista ang ilang pasensiya hilabi na kon wala nag-on ang traffic lights.
Dugang ni Tumulak nga padayon ang pagmonitor nila sa scheduled power interruptions sa Visayan Electric Company (Veco) aron dali usab sila nga makabutang og traffic personnel nga apektado sa maong brownout.
Gibutyag usab niini nga nagpatawag siya og meeting niadtong miaging adlaw sa tanang supervisor sa maintenance, control ug commel section lakip na usab kadtong mga supervisors nga anaa sa field aron pagahisgotan kini nga problema.
Nasabutan nila nga mag-andam permi og battery sa sakyanan nga maoy gamiton kon maigo sila sa brownout.
Samtang aduna na usab sila’y nakareserba nga generators ug batteries nga magamit nila alang sa ilang radyo.
Gisiguro na usab sa Citom nga aduna’y naka-standby nga uninterruptible power supply (UPS) alang sa ilang control nga mao’y nahimong mother computer sa tanang intersections dinhi sa syudad sa Sugbo.
Awhag ni Tumulak nga magsinabtanay sa panahon sa traffic hilabi na karon nga nagsugod na ang klase.
Ang pag-deploy sa Citom ug traffic sa mga dapit nga apektado sa brownout mao ang pagpull-out usab niini sa mga personnel nga dili kaayo busy ang dalan hinungdan nga ibutang gilayon kini sa intersections nga apektado sa maong rotational brownout.