“Where is the money for our school children?”

Kini ang pangutana ni Konsehal Margarita Osmeña may labot sa pahat sa Special Education Fund gikan sa uno porsiyento nga kinatibuk-ang buhis sa real property sa dakbayan sa Sugbo.

Atol sa iyang privilege speech kagahapon, iyang gisaysay nga ang Cebu City, aduna lay P174.2 milyones nga pundo ilawom sa SEF base sa cash flow nga iyang nadawat gikan sa buhatan sa City Treasurer’s Office.

Sa maong pundo, P165 milyones ang naka-time deposit sa banko sulod sa lima ka tuig nga gikatakdang mo-mature karong buwan sa Disyembre ang katunga sa time-deposit ug ang laing katunga sa Enero tuig 2016.

Ang privilege speech ni Osmeña agi og tubag sa pamahayag ni Raddy Diola, chairman sa local school board nga adunay P385 milyones nga pundo ang SEF karong tuiga.

Sa maong kantidad base sa report sa Sun.Star daily, P149.5 milyones ang gitagana para sa maintenance and other operating expenses, P53.9 milyones para sa capital outlay, P33 milyones sa personnel service, P80 milyones sa high school ug laing P68.4 milyones para sa elementary schools.

Matod pa ni Osmeña nga P8.9 milyones nalang ang nahabilin ang magamit nga kwarta sa SEF karong tuiga sanglit ang P165 milyones dili pa magamit hangtod sa buwan sa Disyembre ug Enero sunod tuig.

Gisaysay usab sa chairman sa committee on budget and finance nga niadtong tuig 2014 ang siyudad nakakolekta og P250 milyones para sa SEF ug nagasto ang P227 milyones diin adunay balanse nga P22 milyones.

Nahimo kining P210 milyones human gidugang sa City Accountant ang cash balance nga P187 milyones sugod niadtong Enero 1 sa niaging tuig.

Pagtan-aw ni Osmeña sa cash balance niadtong Disyembre 29, 2014, a­­dunay P204 milyones ilawom sa SEF diin ang P165 milyones dili ma­gamit. Gumikan niini, ang konseho nangayo og katin-awan ngadto sa LSB ug sa buhatan sa City Treasurer ug pasumiteron og report bahin sa SEF gikan sa tuig 2013 hangtod tuig 2015 sulod sa duha ka semana inig ka dawat nila sa suwat hangyo.