ARON paglikay sa posibleng dako nga katalagman, si Mayor Michael Rama gusto nga buhatan og laing karsada ang barangay Hipodromo mga magsilbing lutsanan sa mga sakyanan.

Ang mao nga barangay dunay nag-inusarang entrada ug pagawas sa maong barangay nga nakapa­kuyaw niini, labina panahon sa sunog.

Ang mayor nakigtagbo sa Ayala group nga maoy developer sa Cebu Business Park sanglit buot niya nga adto palutson ang karsada paggawas sa Hipodromo.

Matod sa mayor nga samtang siya nagtan-aw sa layout sa Hipodromo, iyang nakit-an ang panginahanglan sa laing karsada alang sa mao nga barangay.

Nakita niya ang kakuyaw nga ang karsada nga entrance mao ra usab ang exit.

Siya nagkanayon nga kon adunay dautang mahitabo sa lugar, mas grabe pa ang masinati sa katawhan kon itandi sa sunog sa usa ka edepisyo sa Valenzuela City sa kaulohan .

Si Rama nalipay sanglit positibo ang tubag sa Aya­la group.

Gusto sa developer nga lingkoran ang maong problema aron makakuha og maayong solusyon.

Si Martin Aguirre, residente sa barangay Hipodro­mo, nihangop sa plano ni Rama sanglit sila mismo nabalaka sa posibleng dautan nga mahitabo kon magpadayon nga usa ray lutsanan sa mga tawo ug sakyanan sa ilang barangay panahon sa emerhensiya.