WA kaabti og walo ka oras human nibalik sa katungdaan isip hepe sa Fuente police station, si Police Chief Insp. Wildemar Tiu boluntaryong niduso og resignation letter ngadto sa iyang labaw.
Si Tiu nga nibakasyon sa Estados Unidos giakusahan nga may kalambigitan sa kamatayon sa 11 anyos nga libud suroy nga si Chastity Mirabiles.
Si Tiu nitug-an sa Sun.Star Superbalita nga iya nang nahatag ngadto kang PSSupt. Mariano Batiancela sa CCPO ang iyang suwat pagluwat sa katungdanan.
Iyang tumong mao ang paghatag og agianan sa imbestigasyon sa kamatayon sa batang babaye niadtong Abril.
“Pahibaw-on ta ka nga ni resign na ko. Ni-tender kog resignation ni CD (Sr. Supt. Mariano Batiancela).”
Human niya pagduso sa iyang resignation ngadto kang Cebu City police officer in charge Mariano Batiancela, gipahibawo gilayon ang Police Regional Office (PRO)7.
Samtang si Bise Mayor Edgardo Labella, chairman sa Police Coordinating and Advisory Council diin sakop ang CCPO, nagkanayon nga human unya makasumiter si Tiu sa iyang counter affidavit sa mga pasangil batok kaniya, hukman sa NBI ang pagpasaka og kaso o ibasura ang mga batok kaniya.
Atol sa iyang daklit nga pagbalik sa Fuente police station kagahapon, si Tiu ug mga ginsakpan “naka-rescue” og pito ka mga menor-de-edad atol sa iyang pagsuhid sa ilang area of responsibility.
Matod niya nga di unta niya intensyon ang pag-rescue sa mga bata apan iyang nakita nga nibalik ang mga libudsuroy sa kadalanan.
Ang mga bata nga na-rescue gi-turnover sa mga polis ngadto sa Department of Social Welfare and Services aron matabangan.
Dugang niya nga wa pa siya mahibawo kon asa siya edestino.