LUNGSOD sa Consolacion nitala sa labing daghan nga dengue cases niining buwan sa Enero sa kasamtangang tuig.
Sa lima usab nga nakalas tungod sa maong sakit sa niaging buwan, upat niini gikan usab sa nahisgutang lungsod.
Mas menos na ang kinatibuk-ang dengue cases nga natala karon kon itandi sa miaging tuig.
Moabot ngadto sa 451 ka mga kaso sa dengue ang natala sa Provincial Health Office sa tibuok probinsiya sa Sugbo, sa unang buwan ning tuiga.
Nag-una ang lungsod sa Consolacion sa labing daghang og dengue cases, nga niabot ngadto sa 60 ka mga kaso.
Gitug-an usab sa dengue coordinator sa PHO, Cyril Pangatungan, nga usa sa lima ka mga namatay sa maong sakit nagagikan sa barangay Bitoon, lungsod sa Dumanjug.
Gawas sa Consolacion, lakip sa mga dapit nga nitala usab ug daghang dengue cases karong tuig ang Toledo City nga dunay 47, Moalboal, 34, Carcar City, 33, ingun man ang Liloan ug Talisay City, nga parehong dunay 31 ka mga dengue cases.
Matod ni Pangatungan, mas menus kini kon itandi niadtong Enero sa miaging tuig, diin niabot sa 722 ang natala nga kaso sa dengue ug 11 ang namatay.
Kini human gisugdan ang mas halapad nga kampaniya sa PHO batok sa dengue duha ka buwan na nakalabay, mas nimenus na ang mga natala nga kaso karon.
Gikan sa 747 dengue cases niadtong Disyembre sa miaging tuig, karon niubos na lang kini sa 451 ka mga kaso.
Sigun ni Pangatungan, nga gawas sa pagkakat-on na sa mga tawo labot sa pagpanglimpyo sa ilang palibot ug pagpugong nga makasanay ang mga lamok, nakatabang matod pa ang nahitabo nga mga pag-ulan, nga maoy nibanlas usab sa mga breeding places niini.
Bisan sa nakita nga trend pag-ubos na sa dengue cases, gipadayag sa PHO nga dili gihapon angayang mokompiyansa.
Matod pa, dili matag-an ang panahon, hinungdan nga kinahanglan gihapong ipadayon ang mga positibong lakang nga nasugdan aron pagbatok sa maong sakit, ilabi na ang pagpanlimpyo sa palibot.