NAG-UNA ang Butuanon River sa mga siyudad sa Sugbo ug Mandaue nga labing ubos ang kalidad sa tubig ingon man hugaw dinhi sa Sugbo itandi sa kasapaan nga padayong gi-monitor sa Environmental Management Bureau (EMB) 7.

Lakip sa mga priyoridad nga sapa sa EMB 7 hilabi na sa pagmintinar sa kalidad sa tubig, ang mga sapa sa Guadalupe ug Lahug sa syudad sa Sugbo, Sapangdaku sa syudad sa Toledo, Luyang sa lungsod sa Carmen ug Cansaga bay sa Liloan.

Matod sa Environmental Management Specialist II sa EMB 7 nga si Engr. Karlo Cuizon nga usa ning sapa sa Butuanon nga gikonsiderar nila nga ubos kaayo og kalidad sa tubig sa tibuok nasod kay hugaw.

Matag buwan kini nila nga gi-monitor.

Anaa na ubos sa water quality management area ang sapa sa Butuanon ug padayon ang pagmonitor nila sa maong sapa ingon man ang pagpanglimpyo niini.

Nasuta nga nipasar sa biochemical oxygen demand (BOD) ang unang tulo ka station kun upstream area sa maong sapa.

Ang BOD mao ang gidaghanon sa natunaw nga oxygen nga gikinahanglan sa aerobic biological organism sa ilawom sa tubig.

Bisan paman nga gipanghingusgan na sa EMB ug sa lokal nga kagamhanan aron ma-rehabilitate ang maong mga sapa, apan problema ang paglabay sa basura sa maong mga sapa.

Usa sa plano karon sa EMB 7 nga i-edukar na kadtong mga residente nga namuyo duol sa mga sapa hilabi na kadtong gihimo nga usa ka pansayan ang maong mga sapa.

El Niño

Usa ang El Nino nga nakahatag og pagsaka sa organic pollutant sa mga sapa dinhi sa Sugbo tungod kay nihit ang tubig nga nagdagayday ug minus ang pagdagayday sa kagaw.

Ang nagtipon-og nga basura sa sapa ug sa mga hugaw sa tawo nga nakadungag sa pag-ubos sa kalidad niini, nagkapundok ang organic pollutant sa tubig.

“The department is really putting an effort into closely monitoring sa water bodies,” matod ni Cuizon.

Kapin sa 100 ang mga factory kun kompaniya ang nagpaguwa sa ilang tubig hugaw sa Butuanon.

Apan gibutyag ni Cuizon nga dili kini sila mahatagan og discharge permit sa ilang buhatan kon dili ubos sa standard ang kalidad sa tubig nga ilang gipaagas diha sa ilang tugkaran.