MOKABAT sa 300 ka mga sardinas ang napanghatag sa Department of Public Services sa dakbayan sa Sugbo ngadto sa mga residente sa Barangay Lahug isip sa ilang mga sa ilang basura.

Si Mayor Tomas Osmeña, sa iyang bahin, nagkanayon nga usa ka eksperimento ang ilahang gibuhat diin ang Lahug mao ang ilang pilot area.

Matod sa assistant chief sa DPS John Paul Gelasque nga matag usa ka dako nga plastik sa basura didto sa Lahug kagahapon sa buntag, ilang ilisdan og usa ka sardinas.

Dugang ni Gelasque nga base sa feedback sa opisyal sa barangay, nga kon kaniadto sa sapa ilabay ang basura, karon nangita na og basura ang residente aron mailisdan kini og sardinas.

Kagahapon, duha ka compactor ang ilang gidala apan ang usa lang ang napuno.

Gibutyag usab nii­ni nga sa Marso na ang pagpatuman sa maong proyekto lukop dakbayan diin moabot ngadto sa P5 milyones nga kantidad sa sardinas ang ipundo alang niini.

Si Osmeña nibutyag nga sa tuig 1997, sa dakbayan sa Curitiba sa nasod sa Brazil dihang siya mismo nakasaksi nga gipatuman ang maong praktis sa maong lugar .

Tungod kay lisod sudlon ang dapit ug aduna’y problema sa pagkolekta sa basura mao nga gipatuman sa kagamhanan sa maong dakbayan nga ilisdan og itlog ang basura.

Dugang ni Osmeña tungod kay ang residente na ang mamahimong loader, maka-save ang syudad sa suholan sa loader.

Tungod sa maong plano nga palapdan pa kini sa suok nga dapit sa Cebu City, gipaayo niini ang lima ka garbage compactor aron kini magamit.

Sa maong pamaagi, madasig ang residente sa paglabay og tarong sa basura niini aron usab og mahatagan og pagkaon ang mga kabus.

Dugang ni Osmeña nga mamahimong school supplies usab ang ilis sa basura sa panahon sa abli sa klase.