GIPAHINUMDOMAN ni Cebu City Mayor Tomas Osmeña ang Banco de Oro (BDO) nga dili siya mapalit.

Kini human nakada­wat siya kagahapon og Diners Club International credit card gikan sa BDO nga aduna’y P440,000 cre­dit limit bisan paman og wala siya mo-apply niini.

“I’m not for sale,” matod ni Osmeña.

Giangkon ni Osmeña nga aduna siya’y Diners Club International card nga gigamit niya napulo ka tuig ang nakalabay apan di kini ubos sa BDO.

Nakugang ang mayor human siya makadawat sa maong credit card tungod kay wa siyay kasamtangan nga account sa naasoy nga bangko.

“Sipsip, di na madala sa sipsip,” si Osmeña kinsa nagbitbit sa maong suwat nga naka-attach ang card.

Nag-atubang karon ang BDO og legal nga panagsangka kang Osmeña human mipasaka ang mayor og kasong kriminal sa mga executive ug board of directors sa bangko tungod sa giingon nga wala pagdeklarar sa tinuod nga gross sales sa ilang Magallanes-Plaridel branch.

Matod sa usa ka staff sa BDO, kinsa nagdumili sa pagpahingan nga kaniadto, laing bangko ang nanag-iya sa Diners Club International credit card apan gipalit kini sa ilang bangko.