BODYGUARD sa bigtime drug pusher namatay kay nagkigpinusilay sa kapulisan dihang gialarma kay nagpabuto kagahapon sa alas 9 sa buntag sa Sitio Laguna, Barangay Lunas, Asturias, Sugbo.
Si Tirso Inosolango, kapin sa 30 anyos, giilang level 3 drug pusher, giingong sakop sa gun-for-hire, namatay kay nakigpinusilay nila ni Sr. Insp. Narciso Abapo, hepe sa Asturias Police Station, ug mga kauban.
Si Abapo nga nahinabi sa Sun.Star Superbalita nagkanayon nga makadaghan na nga gialarma nila si Inosalango kay kanunay nga mag-ala "Rambo" sa ilang lugar, magpabuto sa armas, ingon man manion sa mga bata.
Niadtong Martes sa alas 8 sa buntag, nitawag sa ilang buhatan ang mga kabanay, ingon man silingan kay nangayog pakitabang sa kapulisan kay nagpabuto.
Sa ilang pag-abot, wa na igkita nila si Abapo, apan gialarma pagbalik nianang Martes sa hapon kay nani-on ug nagpabuto.
Kagahapon sa buntag, sila nakadawat og komunikasyon mismo sa pamilya ug mga silingan kay nanghasi na usab si Inosolango.
Sila si Abapo ug PO3 Exelsior Aguanta nagsakay sa habalhabal aron di makabantay.
Ang uban nila nga mga kauban nagsakay sa patrol car aron di sila mabantayan sa pag-abot sa dapit.
Ang igsuon mismo sa suspek maoy nitudlo sa kapulisan nga dito kini magtago sa usa ka balay ang suspek nga armado og KG-9 sub-machine pistol.
Ilang gipasusi sa usa ka tanod nga nikompirmar nga didto sa sud si Inosolango apan mahadlok kay dunay armas nga gidala ang suspek.
Sila si Abapo ug PO3 Aguanta ningduol sa balay.
Matod ni Abapo nga nakugang sila kay kalit lang nigawas si Inosolango ug nisinggit og “tablahon ta ni, Sir” dayon diretso sa pagpamusil kang Aguanta.
Si Aguanta wa maigo sa pagpusil samtang si Abapo kinsa dito sa likod sa balay nakabawos, naigo si Inosolango sa lawas.
Si Aguanta nibawos sab sa pagpusil kang Inosolango, kinsa nidagan apan nahagba mga singko metros ang gilay-on.
Ilang gidali sa pagdala sa tambalanan sa lungsod sa Asturias ang suspek, apan gideklarar nga dead-on-arrival (DOA).
“Magrambo gyud ni siya, kay magtakin-takin sa iyang KG-9, unya magpabuto maong mangahadlok ang mga residente, lakip ang pamilya” dugang ni Abapo.
Apan wa na nila makit-i ang armas niini.
Si Abapo nibutyag nga si Inosoloango bata-bata sa bigtime pusher nga si Ronnie Gemongala, level 2 drug pusher, nga nadakpan niadtong miaging buwan sa Sitio Buswang, Barangay Bago Asturias.
Siya nihulip sa iyang amo sa pagpamaligyag drugas human nadakpan sa kapulisan sa miaging buwan.
Si Abapo nitug-an nga nakuha nila sa possession ni Inosolango ang usa ka kalibre .45 nga pistola nga dunay tulo ka mga bala, upat ka mga kabhang sa kalibre .45 nga pistola ug clutch bag nga didto sulod ang cellphone ingon man duha ka medium nga putos sa shabu nga nitimbang og 10 gramos nga mobalor og P118,000 ug gamay’ng notebook nga listahan, ingon man mga buwang sa manok.
Si Abapo niingon nga ang armas ni Inosolango ilang ipaubos sa ballistic examination aron pagsuta kon wa ba malambigit og mga kremin.