USA sa mga hitabo nga nakapaukay sa kadautan sa giingon nga sakop sa Philippine National Police (PNP) Anti-Drugs Operation Group ang pagdagit ug pagpatay sa Korean businessman Jee Ick-joo sud sa Camp Crame.

Ang biktima ilang gidagit gamit ang Operation Tokhang sa Philippine National Police dayon gipalukat sa kantidad nga P5-milyones.

Aron di mabulgar ang ilang gihimo, gipatay nila ang Koreano. Apan sagrado ang kinabuhi sa tawo mao nga milutaw ang ebidensya, mialisngaw ang ilang kadautan.

Kini nga hitabo ang nakapabalhin sa kampanya sa PNP kontra droga ngadto sa kampanya kontra police scalawags.

Sa migawas nga pagbana-bana ni PNP Director General Ronald Dela Rosa, mokabat sa 48,000 o 40 porsiyento sa iyang mga sakop ang police scalawags.

Angay gyud silang silhigon sa serbisyo kay sila ang nakadaut sa imahe sa maayong mga pulis nga relihiyosong mituman sa ilang motto nga "To serve and protect."

Akong hangyo sa kugihan natong Director General, tinud-a ang imong kampanya nga limpyuhan ang kapolisan, Sir. Hinaut nga di lang mo mag-focus sa mga pulis nga nalambigit sa Tokhang for ransom modus operandi, lakip na ang nalambigit sa ginagmay nga ilegal nga pangwarta.

Ngangong ingon niini ang akong hangyo? Tungod kay daghan ang nagreklamo nako nga dunay mga pulis nga moadto sa tag-iya sa ilegal nga video karera machines aron mangwarta. Ang gihimo nila, mo-parking pipila ka metros ang gilay-on sa karerahan, dayon pasudlon ang driver sa mobile patrol aron kuhaon ang ilang payola.

Sa mga probinsya, dunay mga pulis nga mitug-an nga hayahay ang ilang panguwarta sa ilegal mining operations. Tiaw mo na nga tag P2,500 diay ang ilang makwarta matag truck load aron makalusot lang sa checkpoint? Kon makakwarta sila sa mining operations, makasapi sab sila sa illegal logging operations.

Duna say mga pulis nga nag-moonlighting sa mga dagkong negusyante nga dunay pagtugot sa ilang hepe. Natural nga mosugot ang hepe kay duna may porsyento sa ilang sweldo.

Bisan ang warrant officer, suma sa reklamo, makasapi sab gikan sa mga nagpasaka og kaso kay ila mang pangayoan og budget aron kuno madakpan ang gireklamo. Ug ang nakapait pa kay makigkonsabo sila sa mga gireklamo, ilang paikyason bugti sa salapi.

Sa mga ronda sa sugalan o kaha drug den, duna say panguwarta kay ila mang limason ang mahalong butang sa ilang dinakpan.

Mao ni nga makaingon ko nga ang motto ning mga pulisa: "To Serve and Collect, inay To Serve and Protect."

General Dela Rosa, Sir, nahibawo ko nga nasayud ka ning ilang panguwarta, nan, himoa ang tanang paagi nga mawagtang ang dangan sa kapolisan.