DAVAO CITY <(Updated) -- Dul-an tulo ka oras ang milabay human giwagtang sa New People's Army (NPA) ang unilateral ceasefire tali sa gobyerno, gikatahong nangatake dayon sila sa mga sundalo sa Davao Oriental.

Sa maong pagpangatake, suma sa nakalap nga report, usa ka junior officer ang napatay ug usa ka sundalo ang usa ang naangol ala 1:45 sa hapon Miyerkules, Pebrero 1, sa Sitio Paliwason, Barangay Lambog, sa lungsod sa Manay.

Usa ka nagpakabanang kawani sa lokal nga gobyerno sa Manay ang nagpahibalo sa SunStar Davao Superbalita labot sa gidangatan sa mga sakop sa 67th Infantry Battalion sa Philippine Army sa ilang lugar.

Giingong dul-an 30 ka mga rebelde ang mipaarak sa mga sundalo nga naglusad og community security visitation sa dapit.

Gipugngan una ang pangalan sa mga biktima sanglit wa pa masayod ang ilang mga pamilya labot sa hitabo.

Pamilya namakwit

Gatusan ka pamilya ang mibakwit tungod sa kahadlok sa Barangay Rizal, Manay, Davao Oriental.

Ang maong barangay walo lamang ka kilometro ang gilay-on gikan sa Barangay Lambog.

Giingon nga mokabat sa 60 porsiyento sa mga residente sa dapit ang mibakwit sa sentrong bahin sa lungsod sa Manay.

Si Major Ezra Balagtey, spokesperson sa Eastern Mindanao Command sa Armed Forces of the Philippines, nagbutyag nga mopadayon sila sa mga military operations aron mapabilin ang kalinaw sa mga dapit nga gipuy-an karon sa NPA.

"It will continue to maintain peace and order and run after lawless elements whoever they are. We do not recognize any areas under NPA control nor are they allowed to roam around with their firearms intimidating people," sulti ni Balagtey. (Jeepy P. Compio)