NUNOT niining desisyon sa mga kadagkuan sa Philippine National Police (PNP) nga ilang ihunong ang ilang agresibong kampaniya batok sa illegal nga drugas, morag magpiyesta og “mag-Sinulog” ang mga nahilambigit sa illegal drug trade. Ang maong desisyon nunot usab sa mando ni Presidente Duterte gumikan sa kalambigitan sa pipila ka mga badlungon nga mga pulis nga misakay aning Operation Tokhang.
Ang maong mga pulis mangidnap og mga langyaw kay nahilambigit kuno sa drugas. Apan kidnapping for ransom diay. Sama niadtong nahitabo sa usa ka negosyanteng Koreano. Unya didto pa gyud gipamatay sulod sa Kampo Krame bisan nakabayad na ang asawa og ransom.
Limpiyuhan kuno usa ang han-ay sa kapulisan sa dili pa ipadayon ang papel sa pulis batok sa illegal nga drugas.
Para nako sayop man ni. Atong ipadayon ang kampaniya samtang manglimpyo sa mga badlungon nga mga pulis. Nakakuha na unta og momentum ang kapulisan sa kampanya batok sa drugas unya mokalit lang sila og hunong. Naa tuod ang Philippine Drug Enforcement Agency (PDEA) pero gamay ra man ang mga agents diha. Mao sab sa National Bureau of Investigation (NBI). Morag midaog man hinoon ang mga durugista aning kalakiha?
Clearance sa NBI
Ania kitay nadawat nga reklamo kabahin sa bayranan sa paglukat og clearance sa NBI. Mihangyo ang reklamante nga dili magpaila.
“Dear Super Bob,
Mangutana lang ko nganong naa may bayad ang National Bureau of Investigation (NBI) fill up form na tag P50 diri sa Naga NBI branch. Mohatag pa gyud ka ug P10 sa mag-encode sa imong data. Bali tanan, P60 unya dili ma-tatak ra sa resibo. Ang matatak ra sa resibo ang P170.
Ania ang sumada: Bayad sa fill up form---P50
Encode data/file applicant ---P10
NBI clearance release--P170 (mao ray mabutang sa resibo). Bali gasto tanan, P250 sa NBI clearance. Pero ang mabutang sa resibo kay P170.
Dako kaayo silag kita kon maka-process silag one hundred plus or more NBI clearance applicants. Sa ubang branch sa NBI ingon ani sad nga bayran ang NBI fill up form.’ (Hinaot matubag ni sa taga NBI).
(bobby@sunstar.com.ph)