LIMA ka mga babaye ang nangalisang ug nagkabuang pagpanagan dihang giihan sa usa ka lalaki samtang nangaon sila sa karenderya kagahapon, Miyerkules.
Ang insidente nahitabo alas 3 sa kaadlawon sa usa ka karenderya sa Times Beach, Ecoland, Barangay 76-A Bucana, dakbayan sa Davao.
Daling miresponde ang kapulisan sa Talomo Police Station sa dapit diin gikuha si Randy (bansagon gitago sa SuperBalita), 32, residente sa Barangay 76-A Bucana, tungod gireklamo sa tag-iya sa kan-anan.
Saysay sa blotter sa kapulisan, nasayrang kalit misulod sa karenderya ang suspek dayon gipagawas iyang kinatawo atubangan sa mga babaye nga pulos call center agents nga nangaon niadtong orasa.
Giingong nangihi pa ang suspek atubangan sa mga babaye nga nakurat dihang giwisi-wisi sa suspek iyang kinatawo.
Nagkabuang pagpanagan ang mga babaye mao nga nasuko ang tag-iya sa karenderya, nanawag dayon og police assistance.
Samtang gikalap kining balita, ang suspek naa sa prisohan nagpaabot sa kaso nga ipasaka sa tag-iya batok kaniya.