NAGSAGUBANG og dakong problema ang Philippine Basketball Association (PBA) ug Gilas Pilipinas 5.0 human mibuhi’g desisyon ang Southeast Asian Basketball Association (Seaba) nga iuswag ang ilang kompetisyon karong tuiga gikan sa Abril ngadto sa ulahing bahin sa Mayo.
Dili preparasyon maoy problema, kon dili ang eskedyul.
Ang Pilipinas nakatakda untang mo-host sa Seaba karong Abril 23-30 apan ang regional basketball Body naaghat sa pag-uswag niini karong Mayo 15-21 tungod kay nasumpaki ang orihinal nga eskedyul sa local tournaments sa Indonesia, Malaysia, Singapore ug Vietnam.
Ang bag-ong eskedyul dakong problema alang sa PBA, nga misaad nga magpahuwam na sab og mga magduduwa alang sa bag-ong line-up sa Gilas Pilipinas.
Ang PBA mosugod sa ilang Commissioner’s Cup karong Marso 17 ug gumikan sa bag-ong eskedyul sa Seaba, posibleng maahat ang PBA teams sa pagbuhi sa ilang labing maayong mga magduduwa.
Usa ka tinubdan sa Spin.ph ang miingon nga mihangyo na ang Samahang Basketbol ng Plipinas sa PBA nga dili mopahigayon og mga duwa atol sa pagpahigayon sa kompetisyon sa Seaba.