GIHIMO ni ALA fighter Melvin Jerusalem ang kapakyasan nga iyang nasinati sa Thailand nga usa ka dakong hagit aron mas maningkamot alang sa iyang gipangandoy nga kalampusan.
Niadtong Enero 25, misuway si Jerusalem (11-1, 7KOs) pag-ilog sa korona sa beteranong si World Boxing Council (WBC) minimumweight champion Thai Wanheng Menayothin (45-0, 17KOs) apan napilde siya pinaagi sa unanimous decision.
Bisan sa kapakyasan, si Jerusalem nakakuha og pagdayeg gumikan sa iyang gipakitang abilidad ug kaisog bisan mao pa lang kini ang labing una niyang away sa gawas sa Pilipinas ug labing unang world title fight.
Alang sa kampo ni Jerusalem, kon dili pa lang sa Thailand gipahigayon ang away, dako ang posbilidad nga nailog sa ilang batos ang korona. Ang Thailand naila sa dili makiangayong desisyon kon boksing ang hisgutan.
Ang tulo ka judges mipadaog kang Menayothin, 78-74, 77-74, 77-74.
Hinuon alang kang Jerusalem, angayan nang ilubong sa limot ang maong hitabo ug motutok na lang sa iyang sunod nga mga tahas.
“Nalipay ra sab ko kay bisan pilde ko, daghan ang midayeg sa akong away. Nagpasalamat ko sa mga nagsuporta nako,” matod sa 22 anyos nga si Jerusalem, kinsa mibisita sa buhatan sa Superbalita Cebu kauban ang iyang trainers nga sila si Michael Domingo ug Edito Villamor.
Gipasabot ni Jerusalem nga aduna siya’y mga leksyon nga nakat-unan sa labing ulahi niyang away ug tinguha niya kining makorehian.
“Naa ko’y mga leksyon nga nakat-unan ato nga away. Karon, gusto nako nga mas maningkamot pa gyud ko. Naka-learn ko nga kuwang pa gyud,” dugang ni Jerusalem kabahin sa iyang abilidad.
Nagkanayon si Villamor nga ning puntoha, wala pa sila masayod kon unsa’y sunod nga tahas sagubangon ni Jerusalem apan segurado siyang dili makig-rematch ang kampo ni Menayothin tungod sa gipakitang away sa ilang batos.
Gipasabot ni Villamor nga naghuwat ra sila sa desisyon ni ALA Promotions president Michael Aldeguer kabahin sa sunod nga tahas ni Jerusalem.
“Rest lang siya karon, seguro mga two weeks. After ana, diha pa nato planuhon ang next fight ni Jerusalem,” asoy ni Villamor.
Sila si Villamor ug Domingo nagkausa sa pag-ingon nga usa si Jerusalem sa ilang mga boksidor nga adunay dakong paglaom nga magmalampuson sa ugma damlag.
“Dako gyud og future si Jerusalem. Tiaw mo nang first fight sa Thailand unya first world title fight wala ra siya’y hadlok. Grabe og mentality,” paghulagway ni Villamor kang Jerusalem.
Si Domingo nakadayeg sab sa kinaiya ni Jerusalem hilabi na sa training.
“Mosunod gyud ni siya sa among instructions ug kugihan sab sa training. Basta dili lang ni siya magbinuang, taas gyud ang maabot ani niya,” matod ni Dominggo.