DUHA ang nangamatay, usa niini ang tres-anyos nga batang lalaki, sa panagbangga sa usa ka van ug Ceres bus pasado alas otso sa gabii niadtong Martes sa Sitio Matnog, Barangay Putat, Tuburan, lalawigan sa Sugbo.

Ang nagbangga mao ang Mitsubishi van nga grey (ACV 800) nga paingon na unta sa Brgy. Tabunok sa Tabuelan ug ang Ceres bus nga padulong sa Tuburan.

Dead-on-arrival (DOA) sa Tuburan District Hospital sila si CJ Senening, tres-anyos nga diha sa front seat, ug ang drayber sa van nga si Napoleon Mahinay, 43, taga Brgy. Tabunok, Tabuelan.

Samtang kritikal ang kahimtang sa inahan ni CJ nga diha usab sa front seat nga si Victoria Sene­ning, ang iyaan nga si Francesca Senening ug ang asawa sa driver nga si Margie Mahinay.

Ang tulo dali nga gidala sa Vicente Sotto Memorial Medical Center (VSMMC) ug sa pagsulat niining maong balita anaa na sa intensive care unit (ICU) ang usa kanila.

Si PO2 Jameller Palanas sa Tuburan Police Station, nga nahinabi sa Superbalita Cebu sa phone interview, mibutyag nga ang mga Senining gikan sa ilang paryente sa Barangay Singko sa Tuburan.

Duna kini gitambungan kalabot sa relihuy­song kalihukan diin aduna usay gipahigayong salo-salo.

Iyang gihulagway si Mahinay nga nakainom samtang nag-drive.

Wa gikatahong nangaangol sa mga pasahero sa Ceres bus nga gikan sa syudad sa Sugbo gawas lang sa driver nga si Robin Ompad, 30, taga Basak Lapu-Lapu nga nakaangkon og mga pangos.

Gihulagway ni Palanas nga tungod sa kakusog sa impact, nalagpot ang van.

Dugang niini nga dag­han na ang mga aksidente nga nahitabo sa dapit sanglit usa man kini ka kurbadahon.

Gawas niini ngitngit ug mingaw ang maong lugar.

Laing tulo ka mga sakay sa Van nga luwas ug wa maunsa. Kini mao sila si Nelson Mahinay, hingkod ang panuigon, ug laing duha ka minor de edad nga sila si Trixie Senining ug Kate Mahinay.

Hinuon ang branch manager sa Ceres nakigtagbo na sa pamilya sa mga biktima.

Sa pagsulat ning maong balita wala pa nasuta kon unsa ang ilang nasabotan.

Kasamtangan karon nga natanggong sa Tuburan Police Station ang driver sa Ceres nga nakabangga samtang nag sabot pa ang both party. Niño B. Baldevino, USJ-R BA Communication intern