WA pay bisan usa ka sangang buhatan sa Banco De Oro (BDO) sa dakbayan sa Sugbo ang nakapabag-o sa ilang business permit alang ning tuiga.

Ang East West Bank (EWB) ug Bank of the Philippine Islands (BPI) gitugotan nga maka-renew sa ilang mayor’s business permit, matod ni Mayor Tomas Osmeña.,

Apan iyang gibutyag nga di gihapon makadagan sa ilang tulobagon ang EWB ug BPI sa higayon nga mapamatud-an sa mayor nga aduna silay gihimong pagpanglimbong batok sa Cebu City Government.

Una niini, si Osmeña niingon nga ang tulo ka mga banko, kansang gipanag-iya sa Filinvest Land Incorporated (EWB) Ayala Land Inc. (BPI) ug SM Prime Holdings Inc. (BDO) kinahanglan moagi sa iyang buhatan ang pagbag-o sa ilang permit sanglit iyang susihon ang ilang mga dokumento.

“For now, more or less we are letting go of (EWB, BPI). We can file charges against them anytime except for SM (BDO),” pasabot ni Osmeña.

Ang mayor nibutyag nga bisan kon way business permit ang mga BDO branches nga nakabase sa dakbayan sa Sugbo, makapadayon gihapon sila sa ilang patigayon.

Apan giklaro ni Osmeña nga kon ang establisemento nga nagnegusyo og way mayor’s business permit, iya kining pasirad-an.

Kini kon ila na unya nga mahan-ay ang mga ebe­dinsya sanglit base sa iyang nakuha nga dokumento niadtong 2015.

Si Osmeña nihulagway nga binuang ang gipakita nga record sa BDO Magallanes branch nga kapin P1,000 ra ang ilang kita matag adlaw nga maoy gikalagotan sa mayor.