MOPASAKA og kaso si Cebu City Mayor Tomas Osmeña batok ni Presidential Assistant for the Visayas Michael Dino didto sa Office of the Ombudsman Visayas gumikan sa giingong pag-apil niiini sa kalihukang pulitikanhon sa Barangay Ermita.

Si Osmeña kinsa niduso og tulo ka ngalan ngadto sa Department of Interior and Local Government nga maoy magsilbing caretaker sa barangay, wala makauyon sa nigawas nga balita nga niduso usab og duha ka pangalan si Kapitan Felicisimo “Imok” Rupinta ngadto sa buhatan ni Dino aron mohulip sa posisyon nga iyang biyaan sulod sa unom ka buwan human mihukom ang Ombudsman Visayas sa pagsuspenso kaniya og unom ka buwan.

Giingong si Dino ang nangayo sa lista ngadto kang Rupinta apan gipanghimakak sa duha.

Kasong obstruction of justice ang isang-at ni Osmeña ngadto kang Dino.

Matod ni Osmeña nga dili na makapanghilabot si Rupinta o maka impluwensiya sa barangay human kini masuspenso sa ombudsman.

Iyang gipasabot nga nirekomendar siya ni­lang kanhi konsehal Augustus Pe Jr., Kapitan Jesselou Cadungog ug SPO1 Adonis Dumpit nga maoy mahimong acting barangay captain sanglit dili kini taga Ermita ug dili ma-impluwensiyahan ang ilang desisyon hilabi na sa pagukod sa illegal nga drugas ug sugal.

Samtang gipadayag ni Osmeña nga kon wala pay matudlo ang DILG nga acting barangay captain sulod niining semanaha, motudlo siya ug barangay chief executive karong Lunes nga maoy magdala sa tingog sa barangay pa­ingon ngadto sa City Hall sanglit apil ang pito ka konsehal sa pagkasuspension.

Iyang itudlo si Atty. Winefredo Orcullo Jr., ang acting market administrator sa dakbayan.

Samtang mihulga usab si Dino nga mosumbalik og kiha ni Osmeña kon kini magpadayon sa pagdaot sa pangalan sa iyang buhatan.

Sa dugang kalambuan, gibutyag sa DILG nga wala pa sila makadawat og rekomendasyon gikan kang Dino.

Ang chief of staff sa OPAV nga si Jonji Gonzales nagkanayon nga dili lang magpakahilom si Dino sa mga hulga sa mayor. Matod ni Gonzales sa press statement nga gipadala niini sa Superbalita Cebu nga lokal ra kaayo ang isyu sa Barangay Ermita.

Dugang niini nga dili ganahan manginlabot si Dino niini.

“If he pursues in filing a case, there is nothing PA Dino can do about it but he is 100 percent sure the Ombudsman will dismiss it. The presidential assistant would not let this thing to pass without any action. He will file criminal and civil case against the mayor for senselessly dragging his name into the mud,” tipik sa statement ni Gonzales.