SOBRA sa 300,000 ka Filipino nga ilegal nga nagpuyo sa Unites States posibleng i-deport, matod sa United States Ambassador to the Philippines Jose Manuel Romualdez.

Sigun sa taho sa CNN Philippines, nasayran ni Romualdez gikan sa iyang kahigalaan sa Washington, D.C. nga dunay listahan ang Homeland Security nga niabot og 310,000 ka Pinoy ang hayan ma-deport o ipugos og balik sa Pilipinas.

Matod niya nga sagad niini mga Pinoy nga wa mga dokumento apan nailhan sa kagamhanan.

Ang Pilipinas wa maapil sa executive order ni U.S President Donald Trump sa pag-ban sa pagsulod sa United States sa mga tawo nga gikan sa pito ka mga nasud, kadaghanan Muslim.

Si President Rodrigo Duterte namulong nga di niya tabangan ang mga Pinoy nga illegal immigrants.

Apan sa pagsunod ni Trump sa iyang saad sa pagsiguro sa U.S borders, nipahimangno si Romualdez, nga ang mga Pinoy sa U.S mamahimong maapektohan kon ang awtoridad mangusog sa pagpahawa sa illegal immigrants.

Matod ni Romualdez nga wa siya nakakita sa listahan sa mga ngalan sa mga Pilipino nga i-deport ug wa siya kahibawo kon giunsa pagtapok ang mga ngalan. Basin madugangan pa og mga Pilipino ang maong listahan. Siya nitambag sa kadtong mga walay legal nga papeles sa pagbiya na sa U.S.

Gikompirmar sa Department of Foreign Affairs nga sa 3.4 million ka Pinoy nga naa sa U.S., moduol sa 310,000 ang way dokumento.

Matod ni Romualdez nga posibleng lakip sa 310,000 ang mga Pinoy nga nag-overstay pero dili residente sa U.S.

Samtang naapil ang National Alliance for Filipino Concerns sa mga protesta sa California ug New York batok sa polisiya sa immigration ni Trump. Maebelle Rallon, USJ-R Intern/cnn.com