GIKONDENA sa kasundalohan ang gilusad nga atake sa gituohang mga miyembro sa rebeldeng New People's Army (NPA) sa usa ka kompaniya sa saging sa Barangay Union, Monkayo, Compostela Valley.

Kahinumdoman alas 7:40 sa gabii niadtong Dominggo, napulo ka mga armadong lalaki nga lulan sa tulo ka mga motorsiklo ang pugsanong misulod sa Musahamat Plantation.

Gidis-armahan sa mga suspek ang mga guwardiya ug pugsanong gikuha ang ilang 12 gauge shotgun ARMSCOR, kalibre .38 nga pusil ug cellphone.

Gikuha sab sa mga suspek ang susi sa backhoe lakip na ang sa dump truck sa kompaniya ug paspas nga miigtad paingon sa wala matinong direksiyon, lulan sa motorsiklo.

Sa sulat-pahayag sa 10th Infantry (Agila) Division, Philippine Army gikondena niini ang atake sa NPA batok sa mga inosenteng sibilyan sa Compostela Valley.

Gidason sa militar nga nagpakita kini sa pagkabandido sa grupo ug wala pagrespeto sa nagpadayong GPH-NDF peace negotiations.

Nanawagan ang militar sa Communist Party of the Philippines nga ipakita ang ilang sensiridad sa hinabing-pangkalinaw tali sa kagamhanan ug mandoan ang NPA nga hunongon ang paglunsad og mga atake.

Nanganti ang kasundalohan nga ilang ipadayon ang ilang tahas ug mandato nga panalipdan ang mga Pilipino gikan sa atake ug hulga sa mga armadong grupo.

Hangtud karon, wala pay opisyal nga pahayag ang NPA kalabot sa insidente. (RSC)