KIDAPAWAN CITY -- Modalikyat og bisita si Presidente Rodrigo Duterte sa M'lang sa probinsiya sa North Cotabato ugmang adlawa, Pebrero 3.
Kini aron nga pangunahan sa presidente ang pag-switch on sa pinakauna nga prototype Non-Inverter Solar Powered Irrigation sa Barangay New Janiuay.
Matud ni M'lang Vice Mayor Joselito Pinol nga solar powered irrigation puwede nga paandaron pinaagi sa 24 ka solar panel.
Pinaagi sa init sa adlaw, ang solar panel puwede niining paandaron ang makina nga magsuplay og kuryente sa duha ka ektarya nga lin-aw sa lugar.
Gumikan niini, gatusan ka mga mag-uuma ang matabangan sa patubig sa ilang basakan.
Nasayran nga matag adlaw moabot og 15 ka ektaryang basakan ang mapatubigan sa solar powered irrigation.
Kung magmalampuson ang proyekto, gamiton kini sa Department of Agriculture (DA) sa ubang dapit sa North Cotabato.
Una nang nakita sa bise mayor ug ni DA Secretary Manny Pinol nga mogamit og gasolina ang mga mag-uuma sa pagpatubig sa ilang basakan kon diin mas mahal ug bug-at sa ilang bulsa.
Gipangandaman na sa mga lokal opisyal sa probinsiya ang pagbisita sa presidente ilabi na sa iyang seguridad. (EEF)