DUNAY punto nga gustong ipaabot si Talisay City Mayor Johnny V. delos Reyes (JVR) sa dihang iyang silutan kadtong mga empleyado nga wala mo­tambong sa flag ceremony niadtong Lunes ug ingon man kadtong mga namiya samtang siya mipadungog pa sa iyang mensahe.

Pagdisiplina maoy iyang tumong ug tuyo kon nganong silutan niya ang maong mga empleyado ug mga elected officials pinaagi sa pagdelatar og tulo ka adlaw sa productivity enhancement incentive (PEI).

Nindot ang maong katuyoan sa mayor kay nag­hisgut man lagi og pagdisiplina sa mga local government employees sa iyang dakbayan.

Pero ang pag-implementar sa silot maoy nakahatag og laing kontrobersiya sa iyang pamunoan. Nganong ang incentives o bonus man sa mga empleyado maoy iyang himuong collateral aron pagdisiplina?

Aduna bay due process nga gisunod si JVR sa wa pa niya himoa ang pagsilot sa maong mga empleyado?

Sa kadaghang mga empleyadong badlungon ilabi na kadtong iyang mga hinanib nga naghatag ug kontrobersiya sa iyang administrasyon, nganong wa man kini niya pangdisiplinaha.

Ang mayor sa iyang pamahayag sa mga tigbalita nagkanayon “kung ikaw kaha ang paistoryahon atubangan sa mga tawo dayun biyaan ka, lalim ba.”

Buot ipasabot nga nainsultohan si JVR nga gitalikdan ug daw sa wa panumbalinga ang iyang gipanulti atol sa flag ceremony. Sa laktod nga pagkasulti wa siya respituhi.

Kini maoy angay ikahibulong sa mayor kon nganong siya gibiyaan.

Ang maayong mamumulong nga nindot paminawon mao kadtong matinud-anon, kinasingkasing nga mobatbat ug labaw sa tanan makamaong motuman sa iyang gipanaad.

Leksiyon nga angay kat-unon ni JVR.