GISUSPENSO ni Presidente Duterte ang anti-drug operations sa Philippine National Police (PNP) sugod niadtong Lunes. Gihimo kini human nabunggo ang “Toknap for ransom” kun pag-kidnap ug pagpatay sa usa ka Koreanong negosyante nga si Jee Ick-joo sa mga pulis.

Gitahasan sa presidente ang Philippine Drug Enforcement Agency (PDEA) nga mao na ang mogukod sa mga sindikato sa ginadiling drugas ug mga druglord. Kon gikinahanglan, mangayo silag abag sa mga sakop sa Armed Forces of the Philippines (AFP).

Si Police Regional Office (PRO) 7 Director Noli Taliño hinuon miklaro nga motabang sila sa PDEA pinaagi sa paghipos og kasayuran kun intelligence gathering kalabut sa mga drug perso­nalities ug ila kining iduso ngadto sa maong ahensiya.

Niangkon usab si PDEA 7 Director Yogi Filemon Ruiz nga nakadawat na siya sa listahan sa mga high-value target kun mga dagkung gipayuhot og ginadiling drugas gikan kang Taliño. Iyang giangkon nga diyutay ra siyag mga sakop mao nga mopunting lang ang ilang operasyon sa maong mga drug lord ug sindikato.

Nagtuo akong maghudyaka ang mga durogista, labi na ang mg ginagmay nga pusher, niining maong kasugoan ni Presidente Digong kay diyutay na man lang ang mga tinugyanan sa balaud nga molutos kanila.

Nasayud na man ang katawhan niining badlungong mga sakop sa PNP nga nagpahimus sa pagsalig ni Duterte ngadto kanila. Tiaw mo nga ang presidente mismo ang mipasalig ngadto sa mga sakop sa PNP nga iyang duphan kadtong mag-atubang og kaso basta kalabut sa iyang kasugoan sa pagukod sa iligal nga drugas.

Gipahimuslan kini sa mga badlungong pulis pinaagi sa pagtanum og ginadiling drugas sa panimay ug opisina ug pagdakop sa sapi-ang mga tawo aron ilang ipakita nga misunod sila sa kasugoan sa presidente samtang kilkilan ang ilang mga dinakpan.

Samtang uyon ako nga limpiyuhan ang PNP sa mga dautang sakop niini, apan dili unta hingpit silang pugngan sa operasyon batok sa drug personalities.

Mahimo unta nga tangtangon niya ang tanang mga sakop sa mga unit nga gitahasan sa pag-operate batok sa ginadiling drugas unya ilisdan ang mga sakop niini sa mga pulis nga kasaligan. Nagtuo akong makapili si PNP Chief Director General Ronald dela Rosa og mga pulis nga tarong nga iyang tahasan niining maong kampanya.

Nahadlok ako nga tungod niining kakuwang sa mga tinugyanan nga mogukod sa mga druglord ug mga ginagmay nga pushers nga mohinayhinay na usab og balik ang ginadiling drugas sa atong nasud.

Hinaut pang bakwion ni Presidente Duterte ang iyang pagpugong sa PNP sa kampanya batok sa ginadiling drugas samtang dili pa uwahi ang tanan.

(msr1144@yahoo.com)