GIPAHIMANGNOAN ang publiko ug mga motorista nga mag-agian sa kadalanan sa dakbayan sa Mandaue nga magmabinantayon kay di na nila mailhan ang mga mananakop.
Nakahukom ang Siyudad nga ipakatap sa Traffic Enforcement Agency of Mandaue (TEAM) ang ilang mga enforcer nga di na magsul-ob og uniporme.
Matod ni Mayor Luigi Quisumbing sa dihang nahinabi sa mga tigbalita kagahapon nga iyang nabantayan nga bisan sa ilang estriktong pagpatuman sa balaod-trapiko sa dakbayan, padayon gihapon wa tumana sa mga motorista ang balaud kon di makakita og traffic enforcer sa dalan.
“A lot of people are saying nga mosunod lang sila kon naay traffic uniformed personnel. I’ll start deploying plainclothes traffic enforcers,” sumala pa ni Quisumbing.
Gipaniguro niya nga di gukdon sa mga enforcer kadtong mga motorista ug pedestrian nga motuman sa balaod trapiko.
Sa miaging semana, gipahibawo sa Team nga ila nang estriktuhon ang pagpatuman sa balaud batok sa jaywalking.
Ilang nabantayan nga usa sa mga nakaingon sa trapiko mao ang mga tawo nga magpataka lang og labang bisan go signal.
Kuyaw usab kini alang sa mga manglabang nga maigo sa mga sakyanan.
Nipasidaan usab ang mayor nga gukdon usab sa Team ang mga sakyanan nga itom ang aso tungod kay buot sa Konseho sa dakbayan nga istriktuhon ang implementasyon sa section 15 sa 1986 nga Traffic Code sa dakbayan ug PA 8749 kun Clean Air Act nga dakong supak batok sa mga sakyanan nga itom og aso (smoke belching).
Sa resolusyon usab ni Konsehal Nilo Seno, iyang nabantayan nga daghang mga sakyanan nga nag-smoke belching nga nigara sa kadalanan sa Mandaue ilabi na ang mga pribadong sakyanan.
Ang Land Transportation Office (LTO) 7 ug Environmental Management Bureau (EMB) 7 nianunsyo niadto nga ilang i-impound ang mga sakyanan nga nilapas sa Clean Air Act human sa tulo ka kalapasan.
Ila usab nga imbarguhon ang plate number, lisensya sa driver ug pamultahon gikan sa P1,000 hangtod sa P5,000.
Sa di pa ihatag og balik ang sakyanan, gitahasan ang tag-iya nga ipaubos og smoke emision test sa mga LTO-accredited emission center ug kinahanglan nga kini nakapasar.
“Several motor vehicles plying the streets of Mandaue City are emitting excessive smoke and fumes,” ni Seno.
Sa iyang resolusyon nga gi-aprobahan sa Konseho, buot niya nga dakpon sa Team ang mga sakyanan nga kusog ug itom ang aso.
Daghan sa mga sakyanan, labina pampubliko, ang nagpadayon pagbiyahe bisan sa itom nga aso nga gibuga niini kay sagad, mga second hand.