NAGTINGUHA ang mga Sugbuanong mixed martial arts fighters nga haruson pagdaog ang ilang tagsatagsa ka mga kombati batok sa lainlaing dayo nga mga kontra sa gikaintapang Cebu Extreme Fight League (CEFL) 2: ‘No Way Out’ promotion karong Pebrero 18 sa Cebu Coliseum.
Mangulo sa kampanya sa Team Cebu mao ang beteranong Yaw-Yan ArDigma featherweight nga si Roel “Akiyama” Rosauro, kinsa makigbatok kang Brazilian jiujits-belter Urtych ‘Tank’ Allarin sa XFC MMA sa Butuan City.
Nagkanayon si Rosauro, kinsa lumad nga taga Camotes Island, nga wala siya gibati og pressure ning awaya ug dako ang iyang pagsalig nga molampos gumikan kay sakto siya sa preparasyon.
Gipasabot ni Rosauro nga nakabintaha sab siya kay makahatag kaniya og dugang kadasig ang pag-away atubangan sa mga Sugbuanon.
Ang Team Cebu fighters nakakuha sab og dugang kadasig gikan kang boxing patron Joeric Calisang, kinsa misaad og kinatibuk-ang suporta sa ilang kampanya.
Sa press conference sa miaging gabii sa Cafe Old Cul de Sac sa Sto. Nino Village sa barangay Banilad, Cebu City, si Calisang nipasabot nga gawas sa boksing, mahiligon sab siya sa MMA ug andam siyang motabang ning maong klase sa paugnat sa kusog.
Nagkanayon si Calisang nga malipayon siya sa iyang pagpakigtambayayong sa Yaw-Yan ArDigma Martial Arts Federation Inc. sa pagpahigayon sa No Way Out.
Matod ni Calisang nga adunay daghang dekalidad nga MMA fighters ang Sugbo nga kon magiyahan og insakto, posibleng makahatag og dungog sa Sugbo sa ugma damlag.
Si Yaw-Yan ArDigma CEO/Founder ug Vis-Min director Master Benigno ‘Ekin’ R. Caniga Jr. nagkanayon nga ang sama niini nga promosyon makatabang sa paghashas sa abilidad sa Sugbuanong MMA fighters.
Gawas kang Rosauro, ang laing duha ka Sugbuanong fighters nga mopakita og aksyon sa supporting bouts mao sila si Nino Rio ‘Pitbull’ Saoy sa Mactan Combat Sports ug Arnel ‘Project X’ Ylanan sa DEFTAC Vagabond Cebu.
Si Saoy, kanhi national Muay Thai member, makigbatok kang Ivan Victorio sa Yaw-Yan Olongapo MMA samtang si Ylanan makigsangka kang Rommel Lugo, sakop sab sa Yaw-Yan Olongapo.
Aduna pa’y dugang mga away nga masaksihan sa promosyon. Ang mga tiket nagbalor og P200 sa upperbox, P500 sa lowerbox, P750 sa ringside ug P1,000 sa VIP/Sponsor. Alang sa gustong magparserba og mga tiket, mahimong motawag sa (032) 255-1405 o 09436568900.