MAGTINAGAKAY ang Rain or Shine Elasto Painters ug Blackwater Elite sa ilang panag-abot og balik karong alas 7:00 sa gabii alang sa deciding Game 3 sa Philippine Basketball Association (PBA) Commissioner’s Cup quarter-finals series sa Araneta Coliseum.
Ang Elite nakakita pa og laing pagsidlak sa adlaw human nila nabawsan ang Elasto Painters, 100-96, sa Game 2 niadtong Martes nga nakatabla sa series ug nakapugos deciding game.
Ning maong duwa, nagkumboya og 59 puntos sila si import Greg Smith ug Bobby Ray Parks Jr. aron pangulohan ang Elite, nga nagtinguhang makasulod sa semi-finals sa labing unang higayon gikan sa ilang pagsulod sa liga.
“Just came in the game focused. We weren’t ready to come home,” matod pa ni Smith, kinsa nagpakatap og 31 puntos.
Gipasalig ni Smith nga buhaton niya ang tanan niyang makaya aron maagak ang Elite sa sunod ang-ang.
“I played in one do-or-die game in my whole life, and that was before I came here. It was in Puerto Rico and we lost. I’m very hungry for this game on Thursday. I’m going to come in as hard as I can, be aggressive. We want it. They want it. It’s going to be a great game,” matod mi Smith sa interbyu sa Spin.ph. “I feel like we have the edge if we can continue to play our basketball, play up tempo, play defense. I’m ready. I’m excited already.”
Ang Elasto Painters padayong mokombati nga adunay haw-ang sa ilang puwersa gumikan kay dili gihapon makaduwa ang usa sa ilang mga sinaligan nga si Ed Daquioag, kinsa adunay angol.
“Out na siya,” matod ni Elasto Painters coach Caloy Garcia. “If we make it to the semis, sa Game 1 puwede na siya.”
Si Daquioag mitali og 19 puntos sa kadaugan sa Elasto Painters sa Game 1 sa series, 83-80, bisan nalimitahan ang oras niini sulod sa korte gumikan sa angol nga iyang nasinati sa 3rd quarter. (ESL)