NAKAUYON ug hugot nga gisu­portahan ni LeBron James ang pag­pahigayon sa Cleveland Cavaliers og mini camp aron mahatagan og solusyon ang ilang problema sa backup pointguard.

Giimbitar sa Cleveland ang mga beteranong free agent nga sila si Mario Chalmers, Kirk Hinrich ug Jordan Farmar.

Gidugang usab nila si Lance Ste­phenson. Gipadayag ni James nga dili siya mopili kon kinsa ang kuhaon sanglit alang kaniya wala siyay problema sa mga gipang-imbitar bisan pa man kauban o kontra niya kaniadto.

“I got the history with all those guys except Jordan,” matod ni James. “I got a history with Lance too, obviously. I got a history versus Kirk. I played him in a lot of playoff series. And I got a history with Rio [Chalmers].

Sa upat, si Chalmers ang mahu­lagway nga adunay igong kasinatian ni James sanglit nagkauban sila sa Miami Heat sulod sa upat ka tuig ug miabot usab sila og upat ka finals diin duha ka kampyonato ilang nalangkat.

Sa iyang bahin, nanghinaot si Ca­valiers coach Tyronn Lue nga ang mini camp makapalig-on sa team human kini miposte og bati nga record sa niaging bu­wan diin usa lang ang ilang daog sa walo ka duwa.

Matod niya nga maayo ra og dagan ang ilang camp apan wa pa mobutyag kon aduna na ba silay pa­pirmahon. “It’s a step in the process,” pasabot ni Lue.

“We’re looking at trying to get better. Not sure if it’s a point guard, not sure if it’s a playmaker, not sure if it’s a big.”